Вайнерлер Төребаев пен Шерниязов қайда екені белгілі болды
![Вайнерлер Төребаев пен Шерниязов қайда екені белгілі болды](/userdata/news/news_89725/image_l.jpg)
ІІМ Қылмыстық-атқару жүйесі комитетіне сотталған вайнерлер Мейіржан Төребаев пен Мейірхан Шерниязов қазір қайда екенін айтты, - деп хабарлайды Massaget.kz тілшісі Tengrinews.kz сайтына сілтеме жасап.
Ведомство мәліметінше, вайнерлер қазір қамауда.
"Қолданыстағы заңнамаға сәйкес айыпталушылар (тергеудегілер) үкім заңды күшіне енгенге дейін аралас қауіпсіздік мекемесінде болады. Қазіргі уақытта аталған адамдардың үкімі заңды күшіне енген жоқ", - деп хабарлады ІІМ ҚАЖК.
Айта кетейік, аралас қауіпсіздік мекемелеріне режимнің әртүрлі түрлері бар сотталғандарды ұстауға арналған мекемелер, сондай-ақ қамауға алуға, бас бостандығынан айыруға сотталған адамдарды ұстау үшін пайдаланылатын тергеу изоляторлары жатады.
Еске салайық, 23 маусымда вайнер Мейіржан Төребаев пен Мейірхан Шерниязовқа сот үкімі шыққан болатын. Сол күні Алматыда Mudarabah Capital қаржылық пирамидасына қатысы бар адамдарға сот үкімі шықты.
Айыпталушы 12 адам. Оның ішінде, танымал вайнерлер Мейіржан Төребаев пен Мейірхан Шерниязов бар.
Төребаев пен Шерниязовтан басқа сотталушылардың барлығы дерлік Қылмыстық кодекстің 262-бабы бойынша ("Ұйымдасқан топ, қылмыстық ұйым құру және оларға басшылық ету, сол сияқты оларға қатысу") кінәлі деп танылды.
Вайнерлер тек 217-бап (Қаржылық (инвестициялық) пирамиданы құру және оған басшылық ету) бойынша кінәлі деп танылды. Сот үкімімен күдіктілерге бас бостандығынан айырудың түрлі мерзімдері тағайындалды.
Сот үкімі бойынша Мейірхан Шерниязов бір бап бойынша кінәлі деп танылып, 5 жылға, Мейіржан Төребаев та тек бір бап бойынша кінәлі деп танылып, 5 жылға сотталды.
Қызықты жаңалықтар мен видеоларды көру үшін TikTok арнамызға жазылыңыз!
С. Сатыбалдина