Үтік басқан. Қаңтарда 23 азаматқа азаптау қолданылғаны дәлелденді
![Үтік басқан. Қаңтарда 23 азаматқа азаптау қолданылғаны дәлелденді](/userdata/news/news_70407/image_l.jpg)
Бас прокуратура қаңтар оқиғасына байланысты ұсталғандарды азаптау ісіне қатысты тергеуді аяқтады, - деп хабарлайды Massaget.kz. Бас прокуратураның баспасөз қызметіне сілтеме жасап.
Мемлекет басшысының тапсырмасын орындау мақсатында прокуратура органдары қаңтар айындағы оқиғалар кезеңінде ұсталғандарға азаптауды қолданған полиция қызметкерлеріне қатысты қылмыстық істерді тергеуді жалғастыруда.
Қазіргі уақытта арнайы прокурорлар Алматы облысының полиция департаментінде үтік басумен азаптауды қолдану туралы іс бойынша тергеу әрекеттерін аяқтады.
Нәтижесінде полиция қызметкерлерінің 2022 жылғы 7-17 қаңтар аралығында Талдықорған қаласында жаппай тәртіпсіздік жасағаны үшін ұсталған 23 азаматқа азаптау қолданғаны дәлелденді.
Қылмыстық кодекстің 146-бабы бойынша 5 полиция қызметкері күдікті деп танылды, оның ішінде 3 Криминалдық полиция басқармасының қызметкері, 1 Әкімшілік полиция басқармасының инспекторы және 1 ЖҚАЖ қызметкері.
2022 жылғы 4 тамызда қылмыстық іс мәні бойынша қарау үшін сотқа жолданды. Бас прокуратура мәліметінше, азаптауды қолданудың басқа да деректерін тергеу аяқталуға жақын.
С. Сатыбалдина