Жетісу облысында әскер қатарына шақырылған сарбаз қайтыс болды. Ол қарулы күштер қатарында үш ай ғана қызмет еткен, - деп хабарлайды Massaget.kz тілшісі "Астана" телеарнасына сілтеме жасап.
Қорғаныс министрлігі жас жігіттің менингиттен кенет қайтыс болғанын айтады. Алайда туыстарының айтуынша, сарбаз бірнеше апта бойы бүйрегі ауырғанына шағымданып, тиісті ем қабылдамаған. Амир өрт сөндіру жаттығуларынан кейін өзін нашар сезінген. Сол күні дене қызуы көтеріліп ауруханаға түскен.
"Кешке қарай науқастың жағдайы нашарлады. Дене температурасы экстремалды деңгейге дейін көтерілді. Осыдан кейін науқас орталық облыстық ауруханаға жеткізілді. Сот-медициналық сараптаманың қорытындысына сәйкес, өлімнің алдын ала себебі жедел жұқпалы ауру, менингит екені анықталды", - , деп хабарлады ҚР ҚК Бас әскери-медициналық басқармасы бастығының орынбасары Берік Ілиясов.
Бірақ туыстары өлімнің бұл нұсқасына сенбейді. Айтуларынша, ұлы ұзақ уақыт бойы бүйрегі ауыратынына шағымданып келген.
"Бұған дейін ол бүйрек ауруы бойынша медициналық бөлімшеге бірнеше рет жүгінген. 28 қарашада ол бөлімшенің медициналық қызметінің басшысына УДЗ жасату үшін хабарласқан. Тек 6 желтоқсанда қалаға барып, УДЗ-ге түсіп, екі жақты пиелонефрит деген диагноз қойды. Медициналық бөлімшеге сол күні түскенімен 3 күн ғана емделді", - деді Мұрат Байтарғанов.
Туыстары өлімге ұзаққа созылған пиелонефрит себеп болды деп есептеп, қайғылы оқиғаның әділ зерттелуіне үміттенеді. Қорғаныс министрлігі бүйрек ауруы мен өлім арасындағы байланысты жоққа шығарады.
"Медициналық құжаттарды, сондай-ақ ауру тарихын ретроспективті талдау 5 желтоқсанда тіркелген осы ауру мен сот-медициналық сараптамамен анықталған өлім себебі арасында себеп-салдарлық байланыстың жоқтығын көрсетеді" , - деді Берік Ілиясов.
Өзекті жаңалықтарды өз уақытында оқу үшін Facebook парақшамызға жазылыңыз!