Ұрланған 14,5 млрд теңге. Қайрат Боранбаевқа қатысты тергеу аяқталды
![Ұрланған 14,5 млрд теңге. Қайрат Боранбаевқа қатысты тергеу аяқталды](/userdata/news/news_72669/image_l.jpg)
Қаржылық мониторинг агенттігі аса ірі көлемде мемлекет қаржысын жымқырды және ақшаны жылыстатты деген күдікке ілінген Қайрат Боранбаев пен оның сенімді адамы Нахановқа, "ҚазМұнайГаз" ҰК" АҚ Басқарушы директоры Ибулла Серді және "QazaqGaz" ҰК" АҚ Басқарма төрағасының орынбасары Жанұзақ Тайырға қатысты істің тергеуін аяқтады, - деп хабарлайды Massaget.kz тілшісі.
Осылайша, ҚМА мәліметінше, күдіктілер 2019 жылы бақылаудағы "Азиягаз Чунджа" ЖШС арқылы газды жеткізу кезінде Qazaq Gaz (бұрынғы ҚазТрансГаз) ұлттық компаниясының қаражатын жымқырудың қылмыстық схемасын жүзеге асырған.
Ұрланған 14,5 млрд теңге көлеміндегі қаражат кейіннен заңды кәсіпкерлік қызметтен дивиденд ретінде бөлу және төлеу желеуімен заңдастырылған.
"Осылайша, күдіктілер жасалған заңсыз операциялардың шын мәнін жасырған. Тергеу барысында келтірілген шығын толық көлемде өтелді. Сонымен қатар, 38 миллиард теңге қолма-қол ақша мен 4,2 миллиард теңгенің жылжымайтын мүліктері тәркіленді. Осы бөлім бойынша тергеу аяқталды, материалдар процеске қатысушыларға таныстыру үшін берілді. Сонымен бірге, Австрия, Латвия, Люксембург, Молдова, Тәжікстан, Біріккен Араб Әмірліктері және Эстониядан заң аясындағы көмегінің нәтижесі келмегендіктен, Боранбаевтың заңсыз әрекеттерінің басқа эпизодтары бойынша тергеу жалғасып жатыр", - делінген хабарламада.
Сонымен қатар, Агенттік заңсыз кірістерге сатып алынған шетелдік активтерді анықтау және бұғаттау жұмыстарын жүргізіп жатыр. Шетелдік әріптестерден материалдар келіп түскеннен кейін тиісті құқықтық баға берілетіні айтылады.
Айта кетейік, 2010 жылдан бері Боранбаевпен еншілес компаниялар Қазақстанда өндірілген газдың едәуір бөлігін шетел шоттарында кіріс шоғырлануымен экспорттаған. Бұл әрекеттер ұлттық мүддеге қайшы жасалды.
Тергеу жұмыстарының нәтижесінде, биылдан бастап жылдық құны 440 млн АҚШ долларынан асатын (207 млрд теңге) қазақстандық газдың көрсетілген көлемі ел ішіндегі тұтынушыларға және мемлекеттің экспорттық әлеуетін арттыруға бағытталды.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
А. Құлтай