Ұлытау облысында 67 жылқы жайылымда өліп қалған
![Ұлытау облысында 67 жылқы жайылымда өліп қалған](/userdata/news/news_102489/image_l.jpg)
Ұлытау облысында 67 жылқы өлі табылды. Алайда жайылымда өлі табылған жылқылар базада тіркелмеген, - деп хабарлайды Massaget.kz тілшісі.
Жаңаарқа ауданына барған делегацияның анықтағаны: ауа-райының қолайсыздығынан, 2023 жылдың желтоқсаны мен 2024 жылдың ақпан айында қардың қалың түсуінен және температураның төмендеуінен және жайылымдарға мұз қатуына байланысты жылқылардың тебіндеуі қиынға соққан. Оны тайлар мен кәрі жылқылар көтере алмаған. Ауыл шаруашылығы жануарларын сәйкестендіру базасының дерегі бойынша қазіргі уақытта ауданда 84,3 мың бас жылқы тіркелген.
Жаңаарқа кенті мен Қаражал қаласы арасындағы автомобиль жолының бойынан өлексесі табылған 23 бас жылқының сәйкестендіру нөмірі болмай шықты. Өлекселер мал қорымына жеткізілді.
Сонымен қатар, Жаңаарқа ауданында сәйкестендіру нөмірі жоқ тағы 44 бас жылқы табылды. Осылайша, жайлымда өлген 67 бас жылқының иелерін де анықтау мүмкін болмаған. Аудандық ветеринарлық станцияларға жылқылардың өліміне қатысты иелерінен әлі ресми түрде өтініш түспеген.
Айта кетейік, Ұлытау облысында 2000 бас және Жаңаарқа ауданында қолда бар мал басының жартысы өлді деген ақпарат шындыққа жанаспайды.
Аптаның басты оқиғалары мен пайдалы видеоларды көру үшін YouTube арнамызға жазылыңыз
С. Сатыбалдина