Ақтау қаласының әкімі тағайындалды, - деп хабарлайды Massaget.kz тілшісі Маңғыстау облысы әкімдігінің баспасөз қызметіне сілтеме жасап.
20 қыркүйекте Маңғыстау облысының әкімі Нұрлан Ноғаев Ақтау қалалық мәслихатының депутаттарына қызметінен өз еркімен кеткен Ербол Ізбергеновтің орнына қала әкімі лауазымына жаңа кандидатты ұсынды.
"ҚР Президенті Әкімшілігімен келісілген жаңа кандидат бұған дейін Маңғыстау облысы әкімінің орынбасары қызметін атқарған Ұлықбек Тналиев болды", - делінген хабарламада.
Ұлықбек Тналиев Атырау мұнай және газ институтының бакалавриатын "Технологиялық машиналар мен жабдықтар" мамандығы бойынша бітірген, "Техника ғылымдары" магистрі, сондай-ақ "Экономика және бизнес"магистрі академиялық дәрежесіне ие. Еңбек жолын 2006 жылы азаматтық қоғам және жастар саясаты саласында бастаған.
Атырау облысы Махамбет ауданы әкімінің орынбасары, Атырау облысы жұмыспен қамтуды үйлестіру және әлеуметтік бағдарламалар басқармасы басшысының орынбасары, Атырау қаласы әкімінің орынбасары қызметтерін атқарған.
2020 жылдан 2022 жылға дейін қоғамдық-саяси жұмыс басқармасының басшысы, Ақпарат және қоғамдық даму министрлігі департаментінің директоры қызметтерін атқарған.
2022 жылдың маусымынан бүгінгі күнге дейін-Маңғыстау облысы әкімінің орынбасары болды.
Қалалық мәслихат депутаттары Тналиевтің кандидатурасын қолдады.
Нұрлан Ноғаев Ербол Ізбергеновке атқарған жұмыстары үшін алғысын білдіріп, Ұлықбек Тналиевке Ақтау қаласының әлеуметтік-экономикалық дамуына қатысты бірқатар нақты тапсырмалар берді.
Тағы да оқи отырыңыз: Баланы қай жаста шахматқа беру керек?
Аптаның басты оқиғалары мен пайдалы видеоларды көру үшін YouTube арнамызға жазылыңыз