Үкімет субсидия берудің ашық болуын толық қамтамасыз етуі керек - Тоқаев

Мемлекет басшысы Қасым-Жомарт Тоқаевтың Ауыл шаруашылығы еңбеккерлерінің бірінші форумында Үкімет субсидия берудің ашық болуын толық қамтамасыз етуі керегін айтты, - деп хабарлайды Massaget.kz тілшісі.

"Бүгін - Ұлттық валюта күні. Төл валютамыз - тәуелсіздіктің символы. Теңгенің тұрақтылығы Қазақстан экономикасының орнықты дамуына ықпал етеді. Мемлекеттің қаржы саясаты бірінші кезекте нақты сектордың өркендеуіне бағытталғаны дұрыс. Бұл салада мемлекеттік қолдаудың ауқымдылығын ескере отырып, есептеу мен қадағалаудың тиімділігін жолға қою қажет. Менің тапсырмам бойынша ауыл шаруашылығындағы статистиканы бұрмалау, жалған құжат толтыру, көзбояушылық фактілерін түп-тамырымен жою жұмыстары жүргізіліп жатыр. Осының нәтижесінде біз саланың нақты жағдайын бағамдай аламыз, экономикалық шығынға соқтыратын тиімсіз шешім қабылдамаймыз. Үкімет субсидия берудің ашықтығын толық қамтамасыз етіп, саланы нарықтық әдіс-тәсілдер арқылы нығайтуды қолға алуы қажет. Бұл салада стратегиялық тұрғыдан сенімді әрі мұқият ойластырылған мемлекеттік реттеу тетіктеріне көшу маңызды", - деді ол. 

Еске салайық, бұған дейін Президент инвестиция экономиканың кен өндіруден тыс салаларына көбірек тартылғанын айтқан еді. 

Жыл соңында жалпы құны 1,2 триллион теңге болатын 180 индустриалды жоба іске асырылмақ.

Қызықты жаңалықтар мен видеоларды көру үшін TikTok арнамызға жазылыңыз!