Ұлттық қауіпсіздік комитеті қазақстандықтарға мемлекеттік шекарадан өту туралы анықтама не үшін қажет болуы мүмкін екенін және азаматтардың мұндай мәліметтерге қаншалықты жиі жүгінетінін түсіндірді, деп хабарлайды Massaget.kz Tengrinews.kz сайтына сілтеме жасап.
Ұлттық қауіпсіздік комитетінің редакцияның ресми сауалына берген жауабына сүйенсек, шекарадан өту туралы анықтама алу қазақстандықтар арасында үлкен сұранысқа ие. 2025 жылы Шекара қызметіне 20 мыңнан аса тиісті өтініш түссе, 2026 жылы бұл көрсеткіш 15 мыңнан асқан.
Шекарадан өту туралы анықтама не үшін қажет?
ҰҚК түсіндіруінше, азаматтар шекарадан өту туралы ресми мәліметтерді түрлі себептермен сұратады. Атап айтқанда, анықтама автокөлік, ұялы телефон және арнайы техника сияқты жеке мүлікті тасымалдау үшін қажет болуы мүмкін.
Бұдан бөлек, құжат виза рәсімдеу кезінде және шетелде іссапарда болғанын растау үшін қолданылады.
Бұған дейін өтініш берушілер мұндай мәліметтерді e-Otinish платформасы арқылы заңнамада белгіленген мерзімде ала алатын.
"Қазақстан Республикасының Мемлекеттік шекарасын кесіп өткенін растайтын анықтама беру жөніндегі мемлекеттік қызметтің енгізілуі халық тарапынан жоғары сұранысқа негізделген және бұл қызметті электрондық нысанда көрсетуді жеңілдетуге әрі жеделдетуге бағытталған", - деп хабарлады комитеттегілер.
eGov Mobile арқылы анықтаманы қалай алуға болады?
Қазіргі уақытта анықтама eGov Mobile мобильді қосымшасында және eGov.kz порталында қолжетімді. Ол Қазақстан шекарасынан өту туралы 2017 жылғы 1 қаңтардан бастап ресми мәліметтерді алуға мүмкіндік береді. Анықтаманы танымал қызметтер бөлімінен сұратуға болады.
eGov Mobile скриншоты.
Tengrinews.kz тілшісі мобильді қосымшадағы қызметтің қалай жұмыс істейтінін тексерді.
Анықтаманы өзіңіз үшін, балаңыз немесе заңды өкіліңіз үшін рәсімдеуге болады.
eGov Mobile скриншоты.
Біздің жағдайымызда анықтама сұранысқа қол қойғаннан кейін бірнеше секундтан соң лезде дайын болды.
Мемлекеттік шекарадан өту туралы дайын анықтама. eGov Mobile скриншоты.
Қызмет тегін көрсетіледі. Бұл ретте мәлімет сұратылатын кезең бір сұраныс үшін үш айдан аспауы тиіс.
Жаңа ережелер бекітілгеннен кейін не өзгереді?
ҰҚК процесті автоматтандыруды сынақтан өткізу үшін Жасанды интеллект және цифрлық даму министрлігімен бірлесіп, eGov.kz порталында пилоттық жоба іске қосылғанын нақтылады.
Мемлекеттік қызмет көрсетудің жаңа ережелерін 2026 жылы бекіту жоспарланған. Тиісті жоба жария талқылау үшін "Ашық НҚА" порталында орналастырылған болатын.
Сонымен қатар, ведомство өкілдерінің айтуынша, бұйрық күшіне енгеннен кейін анықтама алу тәртібі, оны беру мерзімдері, өтініш берушілер тізімі және құжаттың мазмұны өзгермейді.
Бұған дейін ҰҚК шекарадан өту туралы анықтама беру бойынша мемлекеттік қызметті енгізу туралы бұйрық жобасын әзірлегенін хабарлаған болатынбыз. Құжаттың мақсаты - ресми мәліметтерді алуды жеңілдету және бюрократиялық процедураларды қысқарту.
