Түркістан облысында қоластындағы қызметкерінен ірі көлемде ақша бопсалаған басшы ұсталды
![Түркістан облысында қоластындағы қызметкерінен ірі көлемде ақша бопсалаған басшы ұсталды](/userdata/news/news_69925/image_l.jpg)
Түркістан облысында департамент басшысы ұсталды. Ол миллион теңге көлемінде пара алды деген күдікке ілінді. Тергеушілердің айтуынша, бұл ақшаны оның қызметкері жұмыста қалу үшін берген, - деп хабарлайды Оtyrar.kz.
"Түркістан облысы Полиция департаменті Криминалдық полиция басқармасының қызметкерлері жергілікті ҰҚК-мен (Ұлттық қауіпсіздік комитеті) бірлесіп, жедел-іздестіру шараларын жүргізіп, алаяқтық жасаған Сарыағаш ауданының тұрғынын қолға түсірді.
Криминалдық полиция басқармасына Келес ауданының тұрғыны шағымданып, басшысының үстінен арыз түсірді. Арызда мекемедегі бөлім басшысы қызметтік жағдайын пайдаланып, оның жұмыста қалуы үшін ақша талап еткені айтылған. Бұл деректі полиция қызметкерлері Қылмыстық кодекстің 190-бабы 2-бөлігі ("Алаяқтық") бойынша тіркеді", - деп хабарлады облыстық ПД баспасөз қызметі.
Қылмысты ашу мақсатында Криминалдық полиция басқармасы, жедел қимылдайтын арнайы жасақ пен Ұлттық қауіпсіздік комитеті қызметкерлерінен арнайы топ құрылды. Жоспарға сай атқарылған жұмыс нәтижесінде, жедел уәкілдер Келес ауданындағы Абай кенті көшелерінің бірінде күдіктіні жәбірленушіден 1 миллион теңге алып жатқан кезінде ұстады. Қазір бұл жайт бойынша соталды тергеу амалдары басталды.
Г. Досымшалова