Түнгі клубта есірткі сатып жүрген алматылық сотталды

Алматыда есірткі сатушы 10 жылға бас бостандығынан айырылды, - деп хабарлайды Massaget.kz тілшісі Polisia.kz сайтына сілтеме жасап. 

Еске салайық, өткен жылдың қыркүйек айында Алматы полициясы ойын-сауық мекемесінің аумағында синтетикалық есірткі сатып жүрген 27 жастағы жігітті ұстаған болатын.

"Біздің бөлімшенің жедел уәкілдері мен полицияның арнайы жасақтары іс-шараны түнгі сағат 03:00-де жүргізді. Күдікті ұсталды. 1996 жылы туған Р.есімді азамат түнгі клубқа келушінің атын жамылып, есірткі таратумен айналысқан. Ұсталған кезде, оны тінту барысында құрамында синтетикалық заты бар, ашық түсті, ұнтақ түріндегі байлам табылды. Шөп тәркіленіп, сот-химиялық сараптамаға жіберілді.

Сотқа дейінгі тергеу ҚР ҚК-нің 297-бабы бойынша тіркелді. Ұсталған азамат уақытша ұстау изоляторына қамалды", – деді сол кезде Алматы қалалық ПД есірткі қылмысына қарсы күрес басқармасы.

Сот үкімімен 28 жастағы Р.есімді азамат ҚР ҚК-нің 297-бабы 3-бөлігінің 6-тармағында көзделген қылмысты жасағаны үшін кінәлі деп танылып, 10 жылға бас бостандығынан айырылды.

Instagram парақшамызға жазылып, ең қызықты ақпараттарды бірінші болып оқыңыз!