“Тірідей шіріп жатырмын“. Қазақстандық ер адам белгісіз ауруға шалдыққан

Павлодар облысының 26 жастағы тұрғыны Владимир Васильев бес жыл бойы өмірін тозаққа айналдырған аурудан зардап шегіп келеді. Ер адамның аяғы мен денесіне іріңді жаралар шығып кеткен, - деп хабарлайды Massaget.kz тілшісі Tengrinews.kz-ке сілтеме жасап.

Қатты іріңнің салдарынан жараларда құрттар пайда болып жатыр. Жас жігіттің айтуынша, дәрігерлер нақты диагноз қоя алмай отыр. Ол бес жыл бұрын іріңді ангинамен ауырып, емдемеген: ол температураны түсірудің амалдарын ғана жасаған. Ал бір айдан кейін денесіне күлбіреген бөртпелер шыққан.

"Алдымен бүйіріме, содан кейін кеудеме күлбіреген бөртпелер қара сұйықтыққа толып, шіри бастады. Мен ауруханаға бардым. Мені антибиотиктермен емдеді, іріңді жараларды алып тастау үшін бірнеше операция жасап, теріні ауыстырып орналастырды. Барлық жаралар жазылып, бір жылдан кейін қайтадан жаралар шықты. Мен бірден ауруханаға жүгіндім, өйткені мен созып жүріп алуға болмайтынын білдім. Ауруханада ковид жұқтырып алдым, ол ауруды асқындырып жіберді. Содан бері емделе алмай жүрмін. Ең ұзақ ремиссия үш айға созылды, содан кейін бәрі қайтадан басталды. Қазір мен тірідей шіріп жатырмын", - дейді Васильев.

Жас жігіттің айтуынша, оған гангренозды пиодермия диагнозы қойылып, мүгедектіктің екінші тобы берілді, бірақ дәрігерлер тері инфекциясын емдей алмай жатыр.

Владимир Васильевтің туыстары жоқ, оған жергілікті еріктілер көмектесіп жатыр, өйткені ол енді жүре алмайды.

"Ашық жаралар бұлшықеттерді "жеп" тастап жатыр, жаралар қабыршақтанып, іріңдеп, құрттар пайда болып жатыр, мұның бәрі қатты ауыртады. Қаңтарда оның әжесі қайтыс болды және ауру жаңа күшпен дами бастады. Бұрын ол таяқпен жүре алса, қазір төсекке байланды, отыра алмайды, бір қырына бұрыла алмайды, шіріген аяқтарымен ұйықтайды. Владимир Павлодардың көптеген ауруханаларында болды, Алматыға да барды, бірақ оған ешкім көмектесе алмады. Ол күн сайын қысым, аритмиядан дәрі және гормоналды таблеткаларды қабылдайды, ауырсынудан тек трамадол құтқарады", - деді ерікті Екатерина Кудрявцева.

Сурет VITA іздеу тобының еріктілерімен ұсынылды

Владимирге тамақ дайындай алатын, дүкенге баратын, үйді жинай алатын әлеуметтік қызметкер қарайды, сонымен қатар оның ағасы көмектеседі.

"Ағам пешті қыздырады, жараларды өңдейді, төсегімді ауыстырады. Оған мені тастамағанына алғыс білдіремін. Менің анам 18 жасымда қайтыс болды, содан кейін мен әжеммен бірге тұрдым, ал осы жылдың қаңтарында ол қайтыс болды", - дейді Владимир.

Павлодарлық еріктілер әлеуметтік желілерде алғашқылардың бірі болып жас жігіттің жағдайы туралы айтып берді. Владимир мүгедектігі бойынша 76 мың теңге зейнетақы алады, бірақ ол дәрі-дәрмек пен азық-түлікке кетеді. Еріктілер келген кезде үйде ешқандай азық-түлік болмаған. Дәрі-дәрмек пен көмір сатып алатын ақша болмаған. Владимирге көмектесу үшін еріктілер бей-жай қарамайтын павлодарлықтардан көмек сұрады және бір тәулікте 1,3 миллион теңге жинады. Ақшаның бір бөлігі несиелер бойынша қарыздарды өтеуге жұмсалады.

Ал қалған ақшаны Владимир оны аяққа тұрғыза алатын ақылы дәрігерлерге төлеуге дайын.

Павлодар облысының Денсаулық сақтау басқармасы Владимирдің медициналық көмекке алғаш рет 2019 жылдың наурыз айында жүгінгенін растады, ал екі жылдан кейін ол есепке алынды.

"Васильев күрделі санитарлық жағдайларға және мамандардың ұсынымдарының толық орындалмауына байланысты бірнеше рет амбулаториялық және стационарлық ем алды. Алматы Қазақ тері-венерологиялық ғылыми-зерттеу институтының мамандарымен телемедицина жүргізілді. Қорытынды диагноз қойылды. Осы жылдың басынан бастап аудандық және облыстық ауруханаларға жеті рет жатқызылды. Патронаж үйде өткізіледі. Соңғы рет ол 10-21 қазан аралығында жатты, қарашаның басында облыстық аурухананың тері-венерологиялық бөлімшесіне жатқызу жоспарланған. Науқас үнемі бақылауда", - деп сендірді өңірдің денсаулық сақтау басқармасы.

Сурет VITA іздеу тобының еріктілерімен ұсынылды

Владимир ауруханада бірнеше рет жатқанын жоққа шығармайды. Алайда ол неден емделіп жатқанын әлі білмейді.

"Қазан айында 10 күн облыстық ауруханада жатып, кейін аудандық ауруханаға ауыстырылдым. Алдымен олар мені үйге шығарғысы келді. Мен  "қалай үйге қайтамын, менде қабыну бар, жаралар іріңдеп жатыр, мен жүре алмаймын" дедім. Олар мені Успен аудандық ауруханасына жіберді, ол жақта үйге шығуға бірнеше күн қалғанда асқыну басталды. Мен әлі күнге дейін диагнозымның қандай екенін білмеймін. Пиодермия - бұл терінің жалпы жұқпалы ауруы, бірақ оның қайсысы екенін маған айтпайды. Мен ауруханаға да министрлік пен денсаулық сақтау басқармасына шағымданғаннан кейін түстім. Қазір мен емделуге көмектесуді сұраймын, мен небәрі 26 жастамын, мен өмір сүргім келеді", - дейді Владимир.

Успен ауданының жұмыспен қамту және әлеуметтік бағдарламалар бөлімінде жігіттің қандай әлеуметтік көмек алатынын айтып берді.

"Оған күн сайын әлеуметтік қызметкер келеді, регламент бойынша күніне бір жарым сағат бөлінеді. Васильев көмір сатып алу үшін әлеуметтік көмек төлеу мәселесі бойынша біздің бөлімге жүгінбеді. Екінші топтағы мүгедектерге жыл соңына дейін біржолғы 7 АЕК (25 844 теңге) және коммуналдық қызметтерге тоқсандық 2 АЕК (7 384 теңге) төленеді. Бүгінгі таңда Васильевке 40 612 теңге, оның ішінде республика күніне 18 460 теңге төленді. Сондай-ақ қараша айында оған 33 228 теңге төлеу жоспарланып отыр, оның 25 844 теңгесі - біржолғы көмек", - деп түсіндірді Успен ауданының жұмыспен қамту және әлеуметтік бағдарламалар бөлімінің басшысы Асқар Құлатаев.

Владимир Васильевтің архивінен

Қызықты жаңалықтар мен видеоларды көру үшін TikTok арнамызға жазылыңыз!