Ерлан Қарин Қазақстанның вице-президенті болуы мүмкін. Оның кандидатурасын Президент Қасым-Жомарт Тоқаев ұсынды, - деп хабарлайды Massaget.kz тілшісі.
31 тамызда таңертең Құрылтай депутаттары Қазақстанның вице-президенті мен премьер-министрі лауазымдарын келісу үшін жиналды. Мемлекет басшысы Конституцияның 46-бабына сәйкес вице-президент пен Премьер-министрді тағайындайды, ал бұл лауазымдарға үміткерлер Құрылтаймен келісіледі.
Депутаттар алдымен вице-президенттікке үміткерді қарады. Мемлекет басшысы оларға арнаған сөзінде бұл лауазымды енгізудің маңыздылығын еске салды.
"Вице-президент ерекше рөл атқаратын болады, Құрылтай депутаттарымен тығыз жұмыс жасап, Конституциямен айқындалған өкілеттіктерді жүзеге асырады. Осыған байланысты мен Ерлан Қариннің кандидатурасын ұсынамын. Ол - көп жылдар бойы мемлекеттік қызметте еңбек етіп келе жатқан танымал мемлекет қайраткері. Тәжірибесі мол, оны жақсы білесіздер. Ол ұзақ жылдар бойы еліміздің дамуына елеулі үлес қосып келеді. Сондықтан оны лайықты кандидат деп санаймын және Құрылтай депутаттарынан осы кандидатураны қолдауды сұраймын", - деді Қасым-Жомарт Тоқаев.
Еске сала кетейік: 23 тамызда, Құрылтай сайлауы өткен күні Қасым-Жомарт Тоқаев республиканың вице-президенті танымал тұлға, қазақстандықтарға жақсы таныс адам болатынын мәлімдеген еді.
Ерлан Қарин 1976 жылы сол кездегі Оңтүстік Қазақстан облысында туған. Қ.Жұбанов атындағы Ақтөбе мемлекеттік университетін, әл-Фараби атындағы Қазақ ұлттық университетін тәмамдаған.
Әр жылдары Қазақстан даму институтының Саяси зерттеу орталығында, қазіргі заманғы саясат халықаралық институтында еңбек етті.
Маңғыстау облысы әкімінің кеңесшісі, Қазақстан Республикасы Президенті әкімшілігінің Ішкі саясат бөлімінің меңгерушісі, ҚР Президенті жанындағы қазақстандық стратегиялық зерттеулер институтының директоры қызметін атқарды.
Президенттің кеңесшісі де болды. Бұған дейін Мемлекеттік кеңесші қызметін де атқарды.
Ол 2026 жылы маусымда Президент әкімшілігі басшысының бірінші орынбасары болып тағайындалды.
Қызықты жаңалықтар мен видеоларды көру үшін TikTok арнамызға жазылыңыз!