Тоқаев Ердоғанға көңіл айтты
![Тоқаев Ердоғанға көңіл айтты](/userdata/news/news_70878/image_l.jpg)
Мемлекет басшысы Түркия президенті Реджеп Тайип Ердоғанға көңіл айту жеделхатын жолдады, - деп хабарлайды Massaget.kz Ақорданың баспасөз қызметіне сілтеме жасап.
Қасым-Жомарт Тоқаев Түркияның Мардин және Газиантеп провинцияларындағы жантүршігерлік жол-көлік апаттарынан көп адам қаза болуы мен бірқатар азаматтың ауыр жарақат алуына байланысты президент Реджеп Тайип Ердоғанға көңіл айту жеделхатын жолдаған.
"Осындай қиын сәтте қайғы-қасіреттеріңізге ортақтасып, барша қазақстандықтың және жеке өзімнің атымнан сізге және жақындарынан айырылған отбасыларға, сондай-ақ, бауырлас түрік халқына қайғыра көңіл айтамын. Марқұмдардың Алла Тағаланың шапағатына бөленуін, зардап шеккендердің тез арада сауығып кетуін тілеймін", - деп жазылған Президенттің жеделхатында.
Айта кетейік, бұған дейін Түркияның Дерик қаласында адамдарды жүк көлігі қағып өлтірген еді. Жергілікті БАҚ мәліметінше, көлік тежегіші істен шыққан.
Ж. Қадыржанова