Таяу Шығыстағы ахуал: Қазақстанға тағы 800-ден аса азамат жеткізілді

5 наурызға қараған түні Таяу Шығыс елдерінен Қазақстанға 5 рейспен 851 жолаушы жеткізілген. Бұл туралы Азаматтық авиация комитеті мәлімдеді, - деп хабарлайды Massaget.kz тілшісі.

Комитет мәліметінше, жолаушыларды жеткізу үшін қазақстандық және шетелдік әуе компаниялар бүгін де бірнеше рейс орындайды:

• Air Astana әуекомпаниясы Жидда - Ақтау - Алматы және Жидда - Атырау - Алматы бағыттары бойынша екі рейс орындауды жоспарлап отыр.  
• SCAT Airlines әуекомпаниясы Маскат - Алматы бағыты бойынша 2 рейс орындайды.  
• Air Arabia әуекомпаниясы Шаржа - Алматы бағыты бойынша рейс орындап жатыр. Тәуліктің соңына дейін осы бағытта тағы бір рейс жоспарланған.  
• Flydubai әуекомпаниясы Дубайдан Алматы және Астана қалаларына рейстер жасауды жоспарлап отыр.  

Айта кетейік, 3 наурыздан бастап Таяу Шығыс елдерінен Қазақстанға барлығы 12 рейс ұшып келген, нәтижесінде 2111 жолаушы елге оралды.

"Бүгінге жоспарланған рейстерді ескергенде, Таяу Шығыс елдерінен Қазақстанға шамамен 4000 азамат жеткізіледі", - деп жазылған хабарламада.

Қызықты жаңалықтар мен видеоларды көру үшін TikTok арнамызға жазылыңыз!