Тәркіленген есірткі қайда және қалай жойылатыны белгілі болды

Заңсыз айналымнан алынған есірткі қалай жойылатыны туралы ІІМ есірткі қылмысына қарсы іс-қимыл департаментінің басшысы Қажығали Имажанов айтты, - деп хабарлайды Massaget.kz тілшісі Polisia.kz-ке сілтеме жасап.

Жыл сайын полиция 30 тоннадан аса есірткіні анықтайды. Оның негізгі бөлігі - еліміздің оңтүстік аймақтарында өсірілген қарасора. Бұдан басқа 450 келіге жуық синтетикалық есірткі тәркіленеді.

"Тәркіленген есірткі дереу сараптамаға жіберіледі. Сол үшін олардың әр партиясынан осы есірткінің аса үлкен мөлшеріне тең үлгі алынады. Ол қылмыстық іске қосылып, заттай айғақтар камерасына тапсырылады. Қалған есірткі полиция, прокуратура және денсаулық сақтау органдары қызметкерлерінің қатысуымен міндетті фото және бейне түсірілім жасалып, комиссиялық түрде жойылады. Сот үкімі күшіне енгеннен кейін іс бойынша дәлелдемелер ретінде өтіп жатқан есірткі үлгілері де жойылады", - деді Имажанов.

Спикердің сөзінше, есірткіні жою арнайы жабдықталған пештерде жүргізіледі. Қалған күл химиялық өңдеуден өтеді, бұл оларды толығымен жоюға мүмкіндік береді.

"Жойылғанға дейін полиция тәркіленген есірткіні қорғаудың күшейтілген шараларын қабылдайды. Бұл әсіресе құрамында есірткі бар өсімдіктердің салмағы бір дерегі бойынша жеті тоннаға жетуі мүмкін және есірткінің мұндай көлемін заттай айғақтар камерасында сақтау мүмкін болмайтын кезде, өсірілген қарасора дақылдарын жою кезінде ерекше маңызды", - деп атап өтті департамент басшысы.

Мысалы, қыркүйекте Павлодар облысында есірткіге қарсы күресуші полицейлер 60 келіден аса ауған героинін тәркіледі. Бұл - еліміздің ішкі қара нарығындағы кейінгі жылдардағы рекорд партия. Оның құны 915 миллион теңгеден асты. Осы тәуекелдерді ескере отырып, полицейлер қылмыскерлерді ұстап, героин тәркіленген сәттен бастап арнайы мақсаттағы жауынгерлер тартыла отырып, күзет ұйымдастырылды. Есірткі жою орнына да күшейтілген әскерилендірілген күзетпен жеткізілді.

Ведомство мәліметінше, қазір синтетикалық есірткінің жасырын өндірістерінен алынатын прекурсорларды жою өзекті болып отыр. Биыл 9 айда есірткі өндірісінде қолданылатын 79 тоннадан аса химикаттар тәркіленді.

Нашақорлыққа және есірткі бизнесіне қарсы күрес жөніндегі 2023-2025 жылдарға арналған кешенді жоспарға сәйкес 2024 жылдың бірінші жартыжылдығында қылмыстық істер бойынша заттай айғақтар ретінде тәркіленген прекусорларды, улы заттарды және басқа да химиялық өнімдерді қауіпсіз жою үшін өнеркәсіптік субъектілерге өтеусіз негізде беру алгоритмдері әзірленетін болады.

Қызықты жаңалықтар мен видеоларды көру үшін TikTok арнамызға жазылыңыз!