Таразда 63 жастағы "Чели апай" ұсталды
![Таразда 63 жастағы "Чели апай" ұсталды](/userdata/news/news_97282/image_l.png)
Жамбыл облысында Полиция департаменті есірткі қылмысына қарсы іс-қимыл басқармасының қызметкерлері аса ірі көлемде есірткі саудасына қатысы бар деген күдікпен Тараз тұрғынын ұстады, - деп хабарлайды Massaget.kz тілшісі Polisia.kz-ке сілтеме жасап.
Полицейлер алты ай бойы героин тобындағы есірткі өткізудің ірі арнасын анықтау және жою бойынша жасырын тергеу әрекеттерін жүргізді.
Күдіктінің тұрғылықты жерін тінту барысында ерекше иісі бар сұр-қоңыр түсті заты бар екі сіріңке қорабы табылып тәркіленді. Сараптама қорытындысына сәйкес, бұл зат жалпы салмағы 5,45 грамм - шамамен 60 доза героин есірткісі болып шықты.
Арнайы операция нәтижесінде ұсталған әйел - "Чели апай" бүркеншік атымен бұрын героин сатқаны үшін бірнеше рет сотты болған. Ол құрықтау кезінде осындай қылмыстар жасағаны үшін бас бостандығын шектеу түріндегі жазасын соңына дейін өтеп үлгермеген. Осыдан бір жыл бұрын жедел уәкілдер оның 41 жастағы қызын есірткі саудасы саласындағы қылмыстары үшін "Мака" бүркеншік атымен құрықтаған.
"63 жастағы тұрғын бірнеше рет қылмыстық жауапкершілікке тартылғанына, қызы бас бостандығынан айыру орындарында жазасын өтеп жатқанына қарамастан, заңсыз жолмен алынған табыстан бас тартпаған. Бұл дерек бойынша ҚР Қылмыстық кодекстің 297-бабы 1-бөлігімен (Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу - еск.) соталды тергеу амалдары басталды. Күдікті Тараз қаласының ПБ уақытша ұстау изоляторына қамауға алынды. Қазір уақытта есірткі жеткізу арнасын анықтау бойынша қажетті тергеу шаралары жүргізіліп жатыр", - дейді ПД ЕҚҚІБ бастығы Әлім Бажықбаев.
Instagram парақшамызға жазылып, ең қызықты ақпараттарды бірінші болып оқыңыз!
С. Бөлек