Таразда 460 пәтерлі 6 тұрғын үй пайдалануға берілді
![Таразда 460 пәтерлі 6 тұрғын үй пайдалануға берілді](/userdata/news/news_88793/image_l.jpg)
Тараз қаласындағы «Ұлы дала» шағын ауданында жалпы 460 пәтерлі 6 көпқабатты тұрғын үй пайдалануға берілді, - деп хабарлайды Massaget.kz тілшісі Жамбыл облысы әкімінің баспасөз қызметіне сілтеме жасап.
Салтанатты шараға облыстық мәслихат төрағасы Абдалы Нұралиев, Тараз қаласының әкімі Бақытжан Орынбеков, ардагерлер кеңесінің мүшелері мен зиялы қауым өкілдері қатысты.
Абдалы Тоқбергенұлы көпшілікті қуаныштарымен құттықтаса, Бақытжан Орынбеков те ізгі лебізін жеткізіп, бұл бағытта атқарылып жатқан жұмыстарға қысқаша тоқталып өтті.
– Соңғы онжылдықтың бедерінде Тараз қаласында жаңа ықшам аудандар бой көтеріп, тұрғын үй саны арта түсті. Жалпы, соңғы 4 жыл көлемінде Тараз қаласы бойынша 5 800 пәтер берілсе, мемлекеттік бағдарламалар арқылы 3 844 азамат баспаналы болды. Ал пәтер кезегінде тұрған азаматтар 1 956 пәтерге қол жеткізді. Сондай-ақ, ағымдағы жылы қала аумағында 42 тұрғын үйдің құрылысы жүруде десек, жыл қорытындысымен 2 820 пәтерлі тұрғын үйді пайдалануға беру жоспарлануда. Бұл үрдіс алдағы уақытта да үзілмей жалғасын табады, – деді шаһар басшысы «Бақытты отбасы» бағдарламасы арқылы баспанаға қол жеткізген бірқатар қоныс той иелеріне пәтер кілттерін табыстай отырып.
Келесі кезекте облыстық ардагерлер кеңесінің төрағасы Еркінбек Солтыбаев, «Отбасы банк» АҚ Басқарма төрағасының орынбасары Нұрлан Ақшанов ақ жарма ниеттерін жолдады.
Жалпы 2019-2022 жылдар аралығында өңірде «Бақытты отбасы» бағдарламасы бойынша 1 154 отбасы жаңа баспанаға ие болған. Сонымен қатар, биылғы жылдың соңына дейін жаңа тұжырымдама бойынша 1 040 пәтерге 16 нысанды іске асыру жоспарлануда.
А. Жапатова