Танымал опера әншісі Ғафиз Есімов өмірден өтті. Бұл туралы марқұмның жақындары хабарлай бастады, - деп хабарлайды Massaget.kz тілшісі.
"АЛМАТЫДАН ҚАРАЛЫ ХАБАР КЕЛДІ! ҚР Халық әртісі, ҚР мемлекеттік сыйлықтың иегері, атақты опера әншісі, профессор, режиссер, өмірдегі, өнердегі досым - ҒАФИЗ ЕСІМОВ өмірден озыпты.
Марқұмның отбасына, туыс-туғандарына, достарына, шәкірттеріне қайғыларына ортақтасып көңіл айтамыз. Жаның жаннатта, топырағың торқа болсын! Бақұл бол, досым!", - деп жазды Facebook қолданушысы Аймұханбет Есенбеков.
Айта кетейік, Ғафиз Есімов - 1947 жылы Атырау облысы Махамбет ауданы Соройченко ауылында туған. Опера әншісі (лирикалық баритон).
1975 жылы Алматы консерваториясын (қазіргі Қазақ ұлттық консерваториясы) бітірген.
1973 жылдан Қазақ академиялық опера және балет театрының әншісі.
Негізгі партиялары: Абай (А.Жұбанов пен Л.Хамидидің "Абайында"), Думан (Е.Г.Брусиловскийдің "Дударайында"), Алпамыс (Е.Рахмадиевтің "Алпамысында"), Құрманғазы (Жұбанов пен Ғ.Жұбанованың "Құрманғазысында"), Онегин (П.И.Чайковскийдің "Евгений Онегинінде"), Жермон (Дж. Вердидің "Травиатасында"), Дон Жуан (В.Моцарттың "Дон Жуанында"), т.б.
Есімов қонцерттік-шығармашылық қызметімен де қазақтың халық әндерін, халық композиторларының әндерін және қазіргі қазақ композиторларының ән-романстарын насихаттауға үлес қосты. Гастрольдік сапармен МХР-да (1978), Германияда (1986, 1987), Румынияда (1984), Филиппинде (1983), Шри-Ланкада (1986) т.б. елдерде болды.
К.Бәйсейітова атындағы республикалық әншілер байқауы (1975, Алматы) мен М.И.Глинка атындағы бүкілодақтық әншілер байқауының (1977, Ташкент) лауреаты.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!