Табиғатты алдау: Испания ғалымдары шала туған сәбиге арналған жасанды құрсақ ойлап тапты

Барселонаның ғалымдары әйел жатырының прототипін жасап шығарды. Бұл ұрықтың қорғаныш ортасын қалпына келтіру үшін жасанды плацентаны қолданатын және нәрестенің өкпесі, ішектері мен миының жатырдан тыс дамуын жалғастыруға мүмкіндік беретін мөлдір контейнер.

Құрылғы биоүйлесімді мөлдір материалдан жасалған. Ол амниотикалық сұйықтықтың айналым жүйесіне қосылған. Ұрық сыртқы тітіркендіргіштерден оқшауланған, бірақ ультрадыбысты бақылау және жалпы бақылауға болады. Ғалымдар ультрадыбысты құрылғының көмегімен қоректік заттар мен оттегі деңгейін реттей алады және ұрықтың дамуын бақылай алады, деп хабарлайды Reuters басылымы.

"Біз ұрықты ананың ағзасынан тыс дамуға мүмкіндік беретін жүйені жасап жатырмыз. Бұл құрылғыдағы шақалақ  кіндік арқылы тыныс алуды және тамақтануды жалғастырады", - дейді жоба жетекшісі Эдуард Гратакос.

Дүниежүзілік денсаулық сақтау ұйымының мәліметі бойынша, 2019 жылы дүние жүзінде 900 000-ға жуық нәресте мерзімінен бұрын – жүктіліктің алтыншы айында және одан ерте өмірге келген.

Қойларда сыналған

Қойларда жасанды құрылғының клиникаға дейінгі зерттеулері жүргізілді. Қозылар арнайы құрылғыда 12 күн дамыды. Енді ғалымдар оны (барлығы 30-дан астам адам әзірлеуге қатысады) шошқаларда сынап көрмекші. Содан кейін, егер бәрі ойдағыдай болса, зерттеушілер нәрестелерді де жасанды ортада дамытуды бастайды.

"Бұл өте күрделі жоба. Ол медицинада көптеген саланы қамтиды және әртүрлі мамандықтағы мамандардың қатысуын талап етеді. Бұл қиын және өте нәзік жұмыс. Өйткені, шын мәнінде, біз табиғатты алдамақпыз", – дейді Гратакос.

Колумбия университетінің педиатрия кафедрасының ассистенті Келли Вернер бұл құрылғы туралы өз ойын айтты.

"Бұл қызықты жұмыс болғанымен, жасанды орта табиғи ортаның орнын басуға арналмағанын атап өткен жөн. Осы дамуға қарамастан, дәрігерлер ана денсаулығын қолдау және мерзімінен бұрын босануға әкелетін қауіп факторларын азайту үшін бар күш-жігерін салуы керек",-  дейді ол.

Айта кетейік, Жасанды орта  жасаудың мұндай әрекеттері Қытай мен АҚШ-та жасалған, бірақ кейін зерттеушілер соңына дейін жетпей, құрылғылар кеңінен қолданылмады.