Ақтөбе облысының Мұғалжар ауданында электр желілерінің мұз болып қатып қалуы мен бағаналардың опырылуы салдарынан бірнеше ауыл жарықсыз қалды, - деп хабарлайды Massaget.kz тілшісі "Диапазон" басылымына сілтеме жасап.
5 қаңтарда Ащылысай мен Сабындыкөл ауылдарының аралығындағы аумақта 60 бағана, Құмсай мен Ақсу ауылдары арасында 16 бағана опырылып кеткен. Ауа райының әсерінен сымдардың мұз болып қатуы электр желілерінің зақымдануына әкелді. Мұздың салмағынан сымдар үзіліп, бағаналар құлаған.
Аудан әкімдігі хабарлағандай, жергілікті энергетиктер тәулік бойы жарықты қалпына келтіріп жатыр. Оларға ақтөбелік бригадалар көмекке жетті.
"Сымдардағы қатқан мұздың диаметрі 20 сантиметрге жетті. Оларды алып тастағанмен бәрібір қайта пайда болып жатыр. Жұрын, Қаракөл, Сабындыкөл, Ащысай ауылдарында кезекші жасақтар күндіз-түні жұмыс істеп жатыр. Құмсай мен Ақсуда 5 қаңтар күні кешке жарық қосылды. Бұлақты, Миялыкөл, Ембі ауылдарында бригадалар әлі жұмыс істеп жатыр. Сабындыкөл және Ақсу ауылдарында да жұмыстар әлі жүргізіліп жатыр. Себебі ол жақта тіректер құлап кетті. Қажетті материалдар жеткізіліп қойған. 6 қаңтарда энергетиктер таңертең жұмысқа кіріседі", - деді Мұғалжар ауданының әкімі Дархан Ермағамбетов.
Қоса кетейік, "Энергосистема" ЖШС мереке және демалыс күндері Ақтөбеде және одан тыс жерлерде ауа райының қолайсыздығына байланысты аймақтарда электр қуатының үзілгенін, жөндеу жұмыстарына 70-тен астам бригада жұмылдырылғанын, 130 арнайы техника жөнелтілгенін хабарлады.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!