Атбасар қаласында көктемгі су тасқынынан зардап шеккен 200 тұрғынға және су тасқыны қаупі бар аймақтан көшірілген тұрғындарға үйдің кілті тапсырылды. Су тасқыны салдарынан тұрғын үйі тұруға жарамсыз деп танылған 127 отбасы үшін пәтерлер қарастырылған. Тағы 73 отбасы аудан орталығының су тасқыны қаупі бар аймағынан қоныс аударады.
Кілттерді Ақмола облысының әкімі Марат Ахметжанов тапсырды.
"Бүгін біз үлкен оқиғаның куәсі болдық: бірден 200 отбасы жаңа пәтер алды. Бүгінгі қуанышты оқиға - су тасқынынан зардап шеккендерге кілттерді тапсыру Конституция күнін мерекелеу қарсаңында өтетіні ерекше маңызды. Болашақта жаңа пәтерлерде тек бақытты оқиғалар болсын", - деп атап өтті өңір басшысы.
Жаңа үйлер қаланың қауіпсіз бөлігінде орналасқан. Әрлеуі бар пәтерлер, әрқайсысында сантехникалық жабдықтар мен су жылытқыштар орнатылған. Аулада балалардың ойын және воркаут-алаңдары, футбол-баскетбол алаңы орналасқан.
Комиссия шешімімен көпбалалы ана Жұлдыз Сәдуақасованың тұрғын үйі тұруға жарамсыз деп танылды. Бүгін аудан орталығының тұрғыны жаңа пәтердің кілтін алды.
"Сәуір айында бір түнде менің үйім су астында қалғанда, не істерімді білмедік. Мемлекет басшысына және барлық мемлекеттік органдарға қиын жағдайда қолдау көрсеткені және жедел әрекет еткені үшін рақмет. Қазір менің қуанышымда шек жоқ. Енді менің балаларым жайлы жағдайда өмір сүретін болады", - деп бөлісті Ж.Сәдуақасова.
"2017 жылы егер су тек бақшаға келсе, биыл үйге келді. Мемлекет бізге үйлер салды, біз жаңа үйге көштік. Жаңа үйде мен балалармен және немерелермен бірге тұрамын. Балаларға жаңа ойын алаңы ұнайды", - дейді зейнеткер Идрис Байлин.
Естеріңізге сала кетейік, облыс бойынша да, аудан бойынша да су тасқыны салдарын жою бойынша жұмыстар белсенді жүргізілді. Атбасар қаласында ағымдағы жылдың көктемінде 375 отбасы су тасқынынан зардап шекті.
Биыл пәтер сатып алу есебінен 38 отбасы қоныс аударды, бүгінде екі жүз пәтердің кілттері табысталды.
Сондай-ақ жыл соңына дейін 145 пәтерлік тағы екі тұрғын үйді іске қосу жоспарлануда.
Осылайша, тұрғындарды су басу аймағынан көшіру мәселесі толығымен шешілетін болады.
Ақмола облысының әкімдігі ұсынған материал
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!