Әлеуметтік желілерде сотталған бұрынғы денсаулық сақтау вице-министрі Олжас Әбішев Денсаулық сақтау министрлігіне жұмысқа оралғаны туралы ақпарат тарады, - деп хабарлайды Massaget.kz тілшісі.
Мән-жайы
Бұған дейін әлеуметтік желілерде Олжас Әбішев Денсаулық сақтау министрлігі жанындағы ғылыми-техникалық кеңесте жасанды интеллект бойынша секцияны басқарғаны туралы ақпарат тарады. Оның әлеуметтік желілердегі парақшасында да осы кеңестегі жұмыс орны көрсетілген.
Сонымен қатар, кейінгі жазбаларының бірінде 10-11 қазанда Астанада V республикалық форум аясында сессияға қатысатынын жариялаған.
Министрлік не дейді?
Tengrinews.kz сауалына берген жауабында Денсаулық сақтау министрлігі Олжас Әбішев ведомствоның штаттық қызметкері емес екенін хабарлаған. Соған қарамастан, ол ғылыми-техникалық кеңес жұмысына қатысады. Десе де арада ешқандай еңбек қатынасы рәсімделмеген.
Ол не үшін сотталды?
2022 жылғы қазанда сот Олжас Әбішевті "Лауазымдық өкілетін теріс пайдалану" бабы бойынша кінәлі деп танып, оған 4 жылға бас бостандығын шектеу жазасын тағайындады. Сондай-ақ, сот одан және Біртановтан мемлекет пайдасына 1,3 миллиард теңге өндіріп алу туралы шешім шығарды.
Аптаның басты оқиғалары мен пайдалы видеоларды көру үшін YouTube арнамызға жазылыңыз
Ж. Қадыржанова