Қорғаныс министрлігі 12 тамызда су асты іздестіру жұмыстары барысында экипаждың үшінші мүшесінің денесі табылғанын мәлімдеді, - деп хабарлайды Massaget.kz тілшісі.
"12 тамызда экипаж командирінің көмекшісі, капитан Аман Нұрланұлы Амангелдінің денесі табылды. Тәжірибелі ұшқыш. Ол күрделі метеорологиялық жағдайларда бірнеше мәрте ұшып жаттыққан. Түрлі ауқымдағы жаттығулар мен операцияларға қатысқан. Жоғары орындаушылық тәртібімен және мінсіз қызметтік беделімен ерекшеленген", - деп жазылған хабарламада.
Қаза тапқан ұшқыштардың үшеуі де Әуе қорғанысы күштері әскери институтының түлегі.
"Акваторияны және оған іргелес аумақты зерттеу бойынша іздестіру шаралары жалғаса бермек. Апаттың себептерін анықтау үшін тергеу жүргізіліп жатыр", - деп жазылған хабарламада.
Еске салайық, 25 шілдеде Алматы облысында EC-145 әскери тікұшағы радардан жоғалып кетті. 26 шілдеде тікұшақтың сынықтары Сорбұлақ көлінен табылды. 10 және 11 тамызда экипаждың екі мүшесі табылды.
Аптаның басты оқиғалары мен пайдалы видеоларды көру үшін YouTube арнамызға жазылыңыз
Ж. Қадыржанова