СҚО-да бүтін бір отбасы уланған оқиғаға қатысты күдікті табылды

Солтүстік Қазақстанда уланған отбасының ісі бойынша медбикеге қатысты қылмыстық іс қозғалды, - деп хабарлайды Massaget.kz тілшісі.

Солтүстік Қазақстан облысында екі баласы қайтыс болған Коваленконың отбасы қандай өнімнен уланғаны әлі де анықталмады. Сондықтан санитарлық ережелерді бұзу туралы қылмыстық іс тоқтатылды. Қазір полиция тамақтан уланған отбасына көмекке келген медбикеге қатысты тергеуді бастады.

Оқиға қалай болды?

Биыл маусымда Солтүстік Қазақстан облысында жантүршігерлік жағдай болды. Ауылдағы дүкеннен сатып алынған бекон мен тұшпараны жеген бүтін бір отбасы (бес адам) уланып қалды. Оқиға салдарынан 3 жасар бала мен 6 жасар қыз қайтыс болды. Дәрігерлер 28 жастағы әйел мен 2014 жылы туған баланы құтқарып қалды.

Полиция бұған дейін қандай іс қозғады?

Бұған дейін полиция Қылмыстық кодекстің 304-бабы 3-бөлігі "Санитарлық ережелер мен гигиеналық нормативтерді бұзу, абайсызда адамдардың жаппай улануына әкеп соқтырған және абайсызда екі немесе одан да көп адамның өліміне әкеп соқтырған" бойынша қылмыстық іс қозғаған болатын. 22 қазанда қылмыстық іс тоқтатылғаны белгілі болды.

"Бұл қылмыстық іс қылмыс құрамы болмауына байланысты тоқтатылды. Осы қылмыстық істен жеке іс жүргізуге материалдар бөлініп алынып, Қылмыстық кодекстің 317-бабы 4-бөлігі "Екі немесе одан да көп адамның абайсызда өліміне әкеп соққан медицина немесе фармацевтика қызметкерінің кәсіптік міндеттерін тиісінше орындамауы" бойынша соталды тергеу басталды. Тергеу жүріп жатыр", - деді облыстық полиция департаментінің баспасөз қызметінің өкілі.

Бұған дейін балалардың анасы Галина Коваленко уланғаннан кейін келген медбике отбасы мүшелеріне жедел жәрдем шақырмай, белсендірілген көмір бергенін айтқан еді. Дегенмен бұл кезде отбасы мүшелерінің жағдайы ауыр болған.

Медбикеге қандай шара қолданылды?

СҚО Денсаулық сақтау басқармасының баспасөз қызметінің мәліметінше, медбике жұмыстан қуылған.

"Аудандық аурухана директорының бұйрығымен осы елді мекенге қызмет көрсететін медицина қызметкері жұмыстан шығарылды", - деп жазылған Денсаулық сақтау басқармасының ресми жауабында.

Балалардың анасы не дейді?

Галина Коваленконың сөзінше, тергеу барысында олардың отбасы қандай өнімнен уланғаны анықталмаған.

"Вася мен Алисаның өлімінің себебі нитраттан улану екені және олар ағзаға тамақпен бірге енуі мүмкін екені анықталды. Қандағы нитраттар өлімге әкеп соғатын концентрациядан бірнеше есе жоғары екені белгілі болды. Бірақ нақты қандай өнімнен уланғанымыз анықталған жоқ. Біз әлі де дүкеннен сатып алынған беконнан уландық деп ойлаймыз", - дейді Галина Коваленко.

Әйел уланған күні шұғыл түрде ауруханаға жеткізуді талап етпегеніне өкінетінін айтады.

"Бірақ ол кезде не болып жатқанын мүлде түсінбедім. Медбике мұның бәрін көріп тұрды, бірақ ауруханаға жатқызу туралы ештеңе айтпады. Ол өзі көлікпен жүрді, бізді ең болмағанда толық дәрігерлік амбулаториясы бар көрші Боголюбово ауылына апаруға болады. Небәрі бес минуттық жол немесе жедел жәрдем шақыруы керек еді. Бірақ ол жайбарақат кетіп қалды", - дейді Галина.

Әйел тергеу істің мән-жайын ашып, балаларының өлімі үшін кінәлілер жазасыз қалмайды деп сенеді.

Еске салайық, бұған дейін солтүстікте екі бала уланып қайтыс болғаны хабарланды. Кейін оқиға туралы тың дерек шықты. 

Қызықты жаңалықтар мен видеоларды көру үшін TikTok арнамызға жазылыңыз!