Солтүстік Қазақстан облысында отбасының уланып, екі баланың қайтыс болуына қатысты жаңа мәлімет белгілі болды, - деп хабарлайды Massaget.kz тілшісі Tengrinews.kz-ке сілтеме жасап.
Екі бала уланып қайтыс болған ауылда жергілікті дүкенде үйде жасалған тұшпара сатылған. 14 маусымда Қызылжар ауданы Надежка ауылында бір отбасы: анасы мен үш баласы уланып қалды. Үш жасар бала мен жеті жасар қыз көз жұмды.
Сол кезде балалардың 28 жастағы анасы ауыр халде бірінші қалалық аурухананың жұқпалы аурулар бөліміне жеткізілген. 2014 жылы туған бала облыстық балалар ауруханасына жатқызылды. Емдеуден кейін олар сауығып, үйлеріне шығарылды.
Балалардың ата-анасы шұжық пен дүкеннен алынған тұшпара жеп, тәтті газдалған сусын ішкендерін айтқан.
Жұма, 5 шілдеде облыстық қоғамдық кеңес отырысында Солтүстік Қазақстан облысының санитарлық-эпидемиологиялық бақылау департаментінің басшысы Әсет Жұматаев, тергеу аясында санитарлық дәрігерлер ауылдық дүкендегі өндіруші үйінде дайындаған жартылай фабрикаттарды анықтаған.
"Егер бұл жаппай улану болса, оның белгілі бір объектіге қатысы бар-жоғын анықтаймыз, тексеруді тіркейміз, өз процедураларымыз бар. Тамақтан уланумен байланысты факт болды, біз тергеуді бастадық. Атап айтқанда, елді мекенде, дүкенде бұл отбасы жартылай фабрикаттар мен басқа да өнімдерді сатып алған. Дүкенде үйде өндірілген жартылай фабрикаттар сатылатындығы анықталды. Біз әкімшілік өндірісті қозғадық, тиісті рұқсат құжаттарынсыз үйде тамақ өнімдерін өндірген өндірушіні әкімшілік жауапкершілікке тартамыз", - деді Әсет Жұматаев.
Ол "Абайсызда адамдардың жаппай улануына әкеп соққан және абайсызда екі немесе одан да көп адамның өліміне әкеп соқтырған санитарлық ережелер мен гигиеналық нормативтерді бұзу" бабы бойынша қылмыстық істі тергеу жалғасып жатқанын атап өтті.
"Біз басқа ештеңе айта алмаймыз, барлық материал тергеушіге берілді. Мен уланудың себебі тұшпара болды деп айта алмаймын. Бізден басқа зертханалық зерттеулер, сараптамалар, тергеу органдары тергеу жүргізіп жатыр. Анықталған заңбұзушылықтарды осы жағдаймен нақты байланыстыра алмаймыз", - деп қорытындылады Солтүстік Қазақстан облысының санитарлық-эпидемиологиялық бақылау департаментінің басшысы Әсет Жұматаев.
Еске салайық, бұған дейін Солтүстік Қазақстан облысының Денсаулық сақтау басқармасы кешкі асқа шұжық, пицца және тұшпара жеген балалардың өліміне уытты тамақ инфекциясы, инфекциялық-токсикалық шок, мидың ісінуі себеп болғанын атап өткен болатын.
Өзекті жаңалықтарды өз уақытында оқу үшін Facebook парақшамызға жазылыңыз!