Сириядағы кітапханадан Отырардан шыққан ғұлама ғалымның құнды жәдігері табылды 

Қазақстанға Отырардан шыққан ғұлама ғалым, ақын Исмаил бин Хаммад әл-Жауһари әл-Фарабидің "Ас-Сихах" кітабы жеткізілді, - деп хабарлайды Massaget.kz тілшісі Мәдениет және ақпарат министрлігінің баспасөз қызметіне сілтеме жасап. 

Ғылыми зерттеу жұмыстарының нәтижесінде ұлттық қорға енген мұралардың қатарында Отырардан шыққан ғұлама әрі ақын Исмаил бин Хаммад әл-Жауһари әл-Фарабидің "Ас-Сихах" атты кітабы да бар. Кітап атауының қазақша аудармасы - "Тіл тәжі және араб тілінің дұрыс сөздері".

Орталық мемлекеттік архивінің қызметкерлері "Архив - 2025" бағдарламасы аясында Мысыр Араб Республикасынан көптеген тың деректі елге жеткізді.

Сириядағы "Әл-Ассад ұлттық кітапханасынан табылған құнды еңбек  - 40 мың түбірді біріктірген араб тілінің классикалық түсіндірме сөздігі ретінде бағалы. Сөздік араб тілі ғана емес, әдебиеті жөнінде де аса бай мағлұмат береді. Отырарлық ғұлама ғалымның аталған еңбегінің тағы бір қолжазба үлгісі Каир қаласындағы әл-Азһар универсиетінің кітапханасынан анықталып, көшірмесі алынды.

"2022 жылы архивтің қызметкерлері елге жеткізген  "Ас-Сихах" еңбегі ғалымдар тарапынан зерттеліп жатыр. Құнды мұраның елімізде жоқ түпнұсқасының бір бөлігінің табылуы - маңызды жаңалықтың бірі. Себебі Исмаил әл-Жауһари әл-Фарабидің бұл шығармасы жалпы 6 томнан тұрады. Осыған дейін ғұламаның "Ас-Сихах" еңбегінің бір томы Алматы қаласындағы Ұлттық кітапхананың сирек кітаптар мен қолжазбалар қорында қолжазба күйінде сақталған болатын. Мұнан бөлек бұл құнды еңбектің әртүрлі қолжазба нұсқалары Лондон, Берлин, Лейден, Париж қалаларындағы кітапханалардың қорында бар. Архив мамандарының Мысырдан тапқан нұсқасы елдегі нұсқаларды толықтыратынына сенім мол",- деді Орталық мемлекеттік архивінің директоры Сәбит Шілдебай.

Айта кетейік, Қазақстан Республикасы Орталық мемлекеттік архивінің ғылыми өкілдері Ресей, Франция, Қырғызстан, Белоруссияның мемлекеттік архивтерінде, сонымен қатар, Түркия, Иран, Египет сияқты елдердің кітапханалары мен архивтерінде жұмыс істеп, Қазақстан тарихына қатысты барлығы 20 мың парақтан астам құжат анықтап, көшірмесін әкелді.

Аптаның басты оқиғалары мен пайдалы видеоларды көру үшін YouTube арнамызға жазылыңыз