Шымкентте банк бөлімшесінің экс-басшысы ақша жымқырғаны үшін сотталды
![Шымкентте банк бөлімшесінің экс-басшысы ақша жымқырғаны үшін сотталды](/userdata/news/news_72473/image_l.jpg)
Шымкент қалалық сотының қылмыстық істер жөніндегі апелляциялық алқасы "Цеснабанк" филиалының бұрынғы басшысы және азаматтық тұлғаларға қызмет көрсету бөлімінің бұрынғы басшысына қатысты үкім шығарды, - деп хабарлайды Otyrar.kz.
Нұржан Көлбаев Қылмыстық кодекстің 189-бабы бойынша 8 жылға бас бостандығынан айырылды. Ал оның сыбайласы Әсел Садықова 7 жылға сотталды. Сонымен қатар, екеуіне де банк және қаржы ұйымдарында басшылық қызмет атқаруға 10 жыл мерзімге тыйым салынды.
Басылым мәліметінше, Нұржан Көлбаев 2017 жылы депозиттерден қаржы шешіп алып, жасырынып қалған. Оған халықаралық іздеу жарияланып, кейін банкир қолға түсіп, Әсел Садықовамен бірге сот алдында жауап берді.
2022 жылдың 5 шілдесінде прокурорды тыңдап, барлық материалды зерттеген соң, сот екеуін де ақтаған. Апелляциялық арыз беріліп, нәтижесінде мән-жайы зерделенген соң 26 қыркүйекте Көлбаев пен Садықова сотталды.
Үкім заңды күшіне енді.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Г. Досымшалова