Шиналардағы жазулардың мағынасы қандай?

Шинадағы жазуларды тек көріп, ойламай өтіп кететіндер көп. Бірақ оларды түсінбесеңіз, көлігіңіз тек төрт дөңгелегі бар қорапқа айналуы мүмкін! Дөңгелектегі жазулар қандай мағынаны білдіреді? Ол шинаның көлігіңізге сай келетінін қайдан білеміз? RunFlat деген жазудың мағынасы қандай? Толығырақ Massaget.kz тілшісі түсіндіріп береді. 

Дөңгелек маусымын қалай анықтаймыз?

Фото: Нұрбол Ынтымақұлы

Ең оңайынан бастайық. Жалпы дөңгелек маусымын анықтаудың ең сенімді тәсілі - өндіруші ұсынған каталогты қарау. Бірақ бүйірдегі белгілерді жеткілікті ақпар бере алады.

Ескеретін жайт: Айрықша белгілерге қойылатын, қатып қалған ереже жоқ. Сол себепті белгі форасы өндірушіге қарай өзгеруі мүмкін. Бұл өндірушіге байланысты. 

Қысқы шиналарда:

• Қар түйірі;
• Үш тау шыңы бейнеленеді.

Жазғы шиналарда:

• Гүл;
• Жаңбыр тамшысы сияқты суреттер болуы мүмкін.

Барлық маусымға арналған дөңгелектерде:

• M+S
• R+W
• All Season деген белгілерді кездестіруге болады.

Техникалық регламентке сәйкес, қар мен мұзда тек қысқы немесе M+S белгісі бар шиналарды қолдануға рұқсат етіледі.

Дөңгелек өлшемі нені білдіреді және оны қайдан іздеу керек?

Фото: Нұрбол Ынтымақұлы

Шинаның өлшемі - оны таңдаудың негізгі критерийі. Өлшемдер үш негізгі параметрден тұрады:

• Ені
• Профиль биіктігі (бүйірі)
• Дөңгелек диаметрі

Мысалы, 205/55 R16 жазуы:

• Бұнда протектор немесе дөңгелек ені - 205 мм (20,5 сантиметр).
• Профиль биіктігі енінің 55%-ына тең. Демек біздің жағдайда биіктік шамамен 113 мм-ге (11,3 сантиметр) сәйкес келеді. 
• Дөңгелек өлшемі - 16 дюйм. Бұл шамамен 40,26 сантиметрге тең.

Мұндағы R радиус емес, диаметрді білдіреді. 

Автокөлікке қандай дөңгелек өлшемдері сәйкес келетінін қайдан білеміз?

Фото: Нұрбол Ынтымақұлы

Көлігіңізге шиналардың өлшемдері зауыт нұсқаулығында көрсетілген.

Оны табудың оңай жолы 

• Жүргізуші есігі жақтауынан көру;
• Бензин қақпағынан арнайы жапсырманы көру.

Бұл жерде тек өлшемдер емес, сонымен бірге шинаның дұрыс қысымы да жазылады.

Көліктің аспа жүйесі (ходовка) осы параметрлерге негізделіп жасалған, сондықтан өлшемді өзгерту кезінде оның жағымсыз салдарына дайын болыңыз.

Шинаның салмақ және жылдамдық индекстері

Шинаның салмақ индексі сандармен белгіленсе, жылдамдық индексі латын әрпімен көрсетіледі. Мысалы:

• 105 индексі - бір дөңгелекке 925 келі салмаққа дейін төзімді.
• H индексі - дөңгелек 210 км/сағ жылдамдыққа арналған.

Төменгі кестеде шинаның салмақ индексі

Салмақ индексінің артында 14 латын әрпінің бірі орналасқан. Олар "жылдамдық индексі" деп аталады. Яғни белгіленген шектен жылдамдықты асыру, оның жарылуына немесе зақымдануына алып келеді. 

Төменгі кестеде шинаның жылдамдық индексі

Көлікке сай келетін индекс параметрлерін есік жақтауынан немесе бактан көре аласыз.

RunFlat дегеніміз не?

RunFlat технологиясы тесілген дөңгелекпен 50–100 км қашықтыққа дейін жүруге мүмкіндік береді. Бұл технология шинаның бүйірлерін қосымша нығайту арқылы жасалған.

Шыны керек, ескі шинаға "өмір демеуін" беру өзіңізге қазылған шұңқырға тең. Қымбат көрінсе де, жаңа дөңгелекке ақша аямаңыз. "Арзанның сорпасы татымас" деген сөздің көлікке де қатысы бар!

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!