Шетелдіктерді ойыншық қарумен қорқытып, тонап кеткен
![Шетелдіктерді ойыншық қарумен қорқытып, тонап кеткен](/userdata/news/news_98445/image_l.jpg)
Алматыда Сингапур азаматтарына қарақшылық шабуыл жасалды. Белгісіз 5 адам шетелдіктердің жалдамалы үйіне басып кірген, оларды қарумен қорқытып, ақша беруін талап еткен, - деп хабарлайды Massaget.kz тілшісі polisia.kz сайтына сілтеме жасап.
Күдіктілер олардан 3 миллион теңге мен 13 мың доллар (5 миллион 907 мың 882 теңге, 1 доллар - 454,45 теңге) тартып алған. Қылмысты ашу үшін арнайы жедел тергеу тобы құрылды.
"Шетелдіктерге шабуыл жасаған 5 күдікті ұсталды. Күдіктілер 1999, 2001, 2003 жылдары туған. Олар Алматы облысында тұратыны анықталды. Қылмыстың негізгі ұйымдастырушысы Т. есімді азамат бұрын қарақшылық шабуыл жасағаны үшін сотталған. Ол зардап шеккендермен жұмыс істеген, әрі олардың табысы туралы білген. Қылмыстың дайындалу уақыты мен күдіктілердің қалай дайындалғаны белгілі болды. Мұнда бейнебақылау жүйелері маңызды роль атқарды. Айғақтар, оның ішінде 2 ойыншық тапанша тәркіленді", - деді Алматы қаласы ПД басшысының орынбасары Дидар Аханов.
Күдіктілер ПД уақытша ұстау изоляторына қамалды. Ал шетелдік азаматтар полицейлердің кәсіби жұмысын ерекше атап өтті.
Қызықты жаңалықтар мен видеоларды көру үшін TikTok арнамызға жазылыңыз!
А. Жайыққызы