Шетелдік жігітпен танысқан ақтөбелік әйел күтпеген жайтқа тап болды
![Шетелдік жігітпен танысқан ақтөбелік әйел күтпеген жайтқа тап болды](/userdata/news/news_96546/image_l.jpg)
Ақтөбе облысында "шетелдік күйеу жігіт" ақтөбелік әйелді 2 миллион теңгеге алдаған, - деп хабарлайды Massaget.kz тілшісі.
Полиция мәліметінше, мұндай алаяқтардың схемалары жылдар бойы өзгермейді: жәбірленушіге алдымен шет тілінде махаббатқа толы хаттар жолдайды, содан кейін әртүрлі "игі" сылтаумен одан ақша иеленеді.
Мысалы, қазан айының соңында 42 жастағы ақтөбелік әйелге әлеуметтік желіде белгісіз ер адам өзін шетелдік ретінде таныстырып, хабарлама жазған. Осылайша, "шетелдік" пен ақтөбеліктің арасында махаббатқа толы хат алмасу басталған. "Күйеу жігіт" әйелге сыйлықтар, зергерлік бұйымдар мен шетелдік валюта сатып алғаны туралы хабарлама жіберіп, сенімділік үшін сыйлықтардың бейнелері мен фотосуреттерін жіберген. Әрі қарай бұл сәлемдемелерді жіберу үшін кедендік бажды төлеу қажеттігін айтып, әйелге есеп айырысу шотын жолдаған. Әйел жігіт көрсеткен шотқа банк кассасы арқылы 2 млн теңгеден астам ақша жіберген.
Ақшаны алғаннан кейін "күйеу жігіт" байланысқа шығуды тоқтатқан, ал жәбірленуші алаяқтың құрбаны болғанын түсініп, полицияға жүгінді. Алаяқтық фактісі бойынша тергеу жүргізіліп жатыр.
Полиция мәліметінше, әдетте, ақша аударғаннан кейін "шетелдік күйеу жігіттер" бірден із-түзсіз жоғалып кеткен. Интернеттегі таныстықтардың қауіпсіз емес екені туралы жиі ескертілетініне қарамастан, аңғал әйелдер әлі де алаяқтардың арбауына түсіп, оларға өздерінің еңбекпен тапқан ашасын жіберіп, қарыздар мен несиелер алуда.
Өзекті жаңалықтарды өз уақытында оқу үшін Facebook парақшамызға жазылыңыз!
С. Сатыбалдина