Шерзат ісі: екі сотталушыға шығарылған үкім күшінде қалды

Талғарда қаза тапқан Шерзат Болаттың ісі бойынша екі сотталушы түсірген шағым қаралды, - деп хабарлайды Massaget.kz тілшісі.

Қылмыстық істер жөніндегі кассациялық алқа шешімді жариялады. Бірінші және екінші сатыдағы сот шешімдері өзгеріссіз қалды.

Осылайша Азамат Тоқтаубаев пен Дидар Қалиахметовтің кассациялық шағымы қанағаттандырылмады.

Айта кетейік, бұған дейін Азамат Тоқтаубаев пен Дидар Қалиахметовтен кассациялық шағым түскені, екеуі де сот үкімімен келіспегені белгілі болды. 2025 жылы мамырда Азамат Тоқтаубаев 15 жылға, ал Дидар Қалиахметов 7 жылға бас бостандығынан айырылған болатын.

Шерзат ісі туралы не белгілі?

Еске салайық, 2024 жылы 4 қазанға қараған түні Талғарда Шерзат Болат көз жұмды.

2025 жылы 5 мамырда Талдықорған сотында тоғыз айыпталушыға сот үкімі шықты:

• Тергеу мәліметінше, Шерзатқа пышақ жарақатын салған басты айыпталушы Абзал Шынасыл 23 жылға бас бостандығынан айырылды.
• Равиль Сакиев 20 жылға сотталды.
• Қалған айыпталушылар 7 жылдан 15 жылға дейін бас бостандығынан айырылды. 

Аптаның басты оқиғалары мен пайдалы видеоларды көру үшін YouTube арнамызға жазылыңыз