Шерзат Болаттың өліміне қатысты тергеу жыл соңына дейін аяқталады - ІІМ

ІІМ басшысының орынбасары Санжар Әділов Шерзат Болаттың өліміне қатысты істі тергеу жыл соңына дейін аяқталатынын айтты, - деп хабарлайды Massaget.kz тілшісі.

Мәжіліс дәлізінде журналистер Әділовтен тергеудің мән-жайын сұрады.

"Талғардағы кісі өлімі бойынша жыл соңына дейін қылмыстық іс аяқталады. Қылмыстық іс материалдары қылмыстық процеске қатысушыларға танысу үшін ұсынылады. Тергеу аяқталу сатысында. Жыл соңына дейін барлық сараптаманы алып, тергеуді аяқтаймыз", - деді Әділов.

ІІМ өкілінің айтуынша, жақын арада күдіктілерге айып тағылады.

"Осы қылмыстық істің 11 қатысушысы қамауда. Олардың барлығы жауапқа тартылады. Прокурордың келісімі бойынша түпкілікті айып тағылады", - деді ол.

Айта кетейік, 9 желтоқсанда таңертең Шерзат Болаттың ағасы өлі табылды. Полиция мәліметінше, марқұм өзіне-өзі қол жұмсаған, сондай-ақ ол Шерзаттың ағасы Нұрқанат екені расталған.

Нұрқанаттың жерлеу рәсімінен соң Шерзаттың әкесі Қаржаубай Нұрымов ұсталды. Кейін ол 15 тәулікке қамалды. 

Шерзат Болаттың өлімі туралы не белгілі?

Еске салайық, Талғарда 4 қазанға қараған түні жасөспірім көз жұмды, кейінірек өңірдің полиция департаменті осы оқиғаға қатысты мәлімдеме жасады. Ал марқұм Шерзаттың отбасы бұл жайтқа қатысы барлардың бәрін ұстап, жазалауды талап етті. Қалаға ІІМ тобы жіберілді.

Талғардағы қайғылы оқиға: бейнебақылау камераларының жазбалары өшірілгені рас па?

Марқұм Салтанат Нүкенованың ағасы Талғарда көз жұмған Шерзаттың отбасына тегін қорғаушы ұсынды. Сонымен қатар Алматы облысы полиция департаментінің өкілі Талғардағы жаппай төбелесте күдіктілер қандай суық қару қолданғанын айтты.

"Қазақ болып күресеміз". Заңгер Талғардағы жасөспірімнің өліміне қатысты істі соңына дейін жеткізетінін айтты.

Кейінірек полиция тағы да мәлімдеме жасап, халық арасында тараған "Талғардағы жасөспірімнің өліміне бандиттердің қатысы бар" деген ақпаратқа пікір білдірді. Ал 12 қазанда Шерзат Болаттың үйі өртеніп кетті. Артынша марқұмның отбасын полиция күзететін болды.

Талғарда қаза тапқан жасөспірімнің үйі өртенді: оқиға орнынан фотолар 

Аптаның басты оқиғалары мен пайдалы видеоларды көру үшін YouTube арнамызға жазылыңыз