Шенеуніктер Талғардағы 3 миллиард теңгенің даулы мектебі туралы пікір білдірді
![Шенеуніктер Талғардағы 3 миллиард теңгенің даулы мектебі туралы пікір білдірді](/userdata/news/news_70790/image_l.jpg)
Алматы облысы Талғар ауданының шенеуніктері үш миллиард теңгеге салынған жаңа мектептің жай-күйін айтты. Мектеп әлеуметтік желідегі жазбадан кейін көпшіліктің назарына іліккен болатын, - деп хабарлайды "Талғар" газеті.
Жаңа білім беру мекемесі "№25 мектеп-гимназия" деп аталады. Оның құрылысына тапсырыс беруші Талғар ауданының әкімдігі емес, Алматы облысының Құрылыс басқармасы болып шықты. Мектеп мемлекеттік органдардың теңгерімінде емес екені айтылды, тапсырыс беруші оны облыстық Білім басқармасына береді.
"Құрылысты облыс басшылығы бақылады. Нысан Талғар ауданы аумағында орналасқандықтан, аудан әкімі қатар бақылау жүргізді. Ол құрылысқа қатысты, бірақ аудан тапсырыс беруші ретінде әрекет етпеді. Сондықтан мектеп құрылысының қаржысына аудан әкімдігі араласты деген пікір қате. Басылымда жарияланған суреттер бір бөлмеде әртүрлі ракурстан түсірілген. Бірақ бүкіл мектеп бұзылып жатқандай жазған. Бұл олай емес", - дейді Талғар аудандық білім бөлімінің басшысы Қарлыға Сәдуақасова.
Қарлыға Садуақасова. Фото: talgargazeti.kz
Оның айтуынша, 10 тамызда 1-қабатта ұлдар шешінетін бөлменің жуынатын бөлімінде құбыр жарылған. Тұрақты жұмыс істемегендіктен, тұрмыстық және ауызсу құбырларының бұрандалы буындарын тот басқаны анықталған.
"Бүкіл ұл балаларға арналған киім ауыстыратын бөлмені су басқан, салдарынан еденнің негізі ажыраған. Бұл негізгі құрылымға жатпайтын аралықта сызаттардың пайда болуына әкеп соққан. Әзірлеуші есебінен демонтаж жасалды. Қазір монтаждау жұмыстары жүргізіліп жатыр. 25 тамызда аяқталады. Байланыс қайта жүргізіледі, бөлме бұрынғы қалпына келтіріледі. Біз бұл туралы хабардар болдық. Бригада жасақталып қойған, мердігерлер 14-15 тамызда жұмысқа кірісуі керек еді. Жазба 13 тамызда шықты", - деді ол.
Сәдуақасова акт залдағы төбенің дымқылдануы мамырдың ортасында жауған нөсер салдары екенін атап өтті.
"Өкінішке қарай, барлық залал бір күнде анықталмай жатыр. Акт залының төбесінен су ағып, 7-блокта Ыбырай Алтынсарин бейнеленген бір қабырғаға зақым келді. Барлығы іске қосылды. Қабырғадағы сурет бүлінген соң мердігер 7-блоктағы шатырды толық ауыстырған. Қабырғаға келетін болсақ, бұл жұмыстың жартысы аяқталды. Тек бояу, бояуды қалпына келтіру ғана қалды. Акт залындағы шатыр жаңбырдан кейін бірден қалпына келтірілді. Төбенің материалын өзгертуге уақытымыз болмады, бірақ бүгінде мәселе толық шешілді", - деп түсіндірді ол.
Бас мердігерлердің айтуынша, жауын-шашын салдарынан қоймадан су ағып кеткен. Ал құрылысшылардың айтуынша, мектеп аумағынан лай су аққан, су жертөлелерді басып, спорт және ойын алаңдарын бүлдірген, құдықтарды су басқан.
"Нәтижесінде акт залдың төбесінде жолақтар пайда болды. Қазір шатырдың осал тұстары герметизациялау арқылы жойылып, төбе жабыны ауыстырылды. Бірінші кезеңде мектептің құдықтары мен жертөлелері тазартылды. Екінші кезеңде мектеп аумағындағы спорт және ойын алаңдары мен жолдарды ластанудан тазарту жұмыстары жүргізілді", - деп түсіндірді құрылыс компаниясы өкілдері.
Мектеп 2021 жылдың желтоқсанында пайдалануға берілді. Қарлыға Сәдуақасованың айтуынша, 2023 жылдың аяғына дейін ғимаратқа құрылыс компаниясы қызмет көрсетеді, яғни кепілдік мерзімі бар.
"Бұл осы мектептің айналасында шу көтеру үшін арнайы жасалған дей аламын. Адамдарға мән-жайды біліп, түсіну қызықсыз. Тек тақырыпты осылай көтеру керек болды. Шын мәнінде, бұл бізді көптеген істен алшақтатты, мысалы, министрлік, білім басқармасын аяғынан тік тұрғызды. Адамдар қанша істерін тастап келді. Шын мәнінде, біз бұдан хабардар болдық. Жұмыстар жоспарланған болатын. Яғни, ешкім біз үшін Америка ашқан жоқ. Бұл олардың арқасында тосыннан ашылмады. Қазір адамдарды түсінбейсің, дау арқылы лайк жинайды, ақша табады, қаралым жинайды, осындай. Шын мәнінде, бұл мектеп оларды қызықтырмайды. Тек тақырып маңызды болды. Аурухана, мектеп немесе дәретхана ма, маңызды емес.
Біздің мектептің облыста баламасы жоқ. Талдықорғанда, бұрынғы облыс орталығында мұндай мектеп жоқ. Сол жерден келген адамдар "Шынында да, үлкен мектеп. Мұнда бәрі қарастырылған. Болашақта бұл балаларға, ата-аналарға қуаныш әкеледі!" дейді. Даулы жазбадан кейін министрлік пен білім басқармасының өкілдері келді, қанша ата-ананы камераға түсіп, аумақты аралап, мектеп ішін, сыртын қарады, барлығы риза болды. Кез келген құрылыста ақаулар болуы мүмкін және оларды жоюға болады. Бұл апат жағдайында дегенді білдірмейді. 25 тамызға дейін барлығы түзетіледі, жұмыс штаттық режимде жүргізіледі. Мектеп жұмыс істейді", - деді ол.
Сәдуақасова көшедегі дәретхана туралы да айтты. Ол 2017 жылы мемлекеттік сараптамадан өткен жоба бойынша салынған.
"Ол кезде сыртта дәретханалар болмауы керек деген құжат болған жоқ. Мектеп ішінде 42 дәретхана бар. Унитаздың жалпы саны - 106, яғни мұнда ұлдарға да, қыздарға да арналған ішкі дәретханалар қарастырылған. Қызметкерлер, мұғалімдерге де бар. Біз сыртқы дәретхананы су өшірілгенге дейін қолданбаймыз. Су тоқтап қалатын жағдайлар болады. Ішкі дәретханалар бір сағат бойы жұмыс істемейді, елестетіп көріңізші, барлық 1200 бала дәретханаға барады, бірақ су жоқ. Сондықтан сыртқы дәретханалар су тоқтатылған жағдайда қажет", - деп атап өтті ол.
1 қыркүйекте жаңа мектеп балаларға есігін айқара ашады.
Еске салайық, жаңа оқу орны әлеуметтік желілерде жарияланғаннан кейін қызу талқыға түскен болатын. Instagram-топтарда жаңа оқу орнының шатырынан су ағатыны, балаларға арналған дәретхана сыртта салынғаны жазылған еді.
Ж. Қадыржанова