Сенат депутаты Хасан Қасымбаевпен туыс екенін растады

Алматы облысынан сайланған Сенат депутаты Мұхтар Жөргенбаев жақында қамауға алынған Хасан Қасымбаевпен туыс екенін растады, - деп хабарлайды Massaget.kz тілшісі.

Бұған дейін БАҚ беттерінде депутат Қасымбаевтың туысы деген ақпарат тараған болатын. 

"Иә, мен әлеуметтік желідегі жазбаларды көрдім. Ол ақпаратқа сенсек, мен Қасымбаевтарға қатысты Талғарда болған жағдайға әсер етіппін. 

Аслан Қасымбаевтың қызметіне қатысты ешкімге ешқандай өтініш айтпағанымды ресми түрде мәлімдеймін. Оның үстіне Хасан Қасымбаевқа қатысты жүріп жатқан тергеуге де ешқандай әсер еткен жоқпын", - дейді Жөргенбаев. 

Депутат Қасымбаевпен алыс туыс екенін айтты. 

"Туыс екенімізге қатысты: иә, ол менің алыс туысым екенін растаймын. Қазақта туыс көп қой. Бірақ үнемі байланыста жүрдік деп айта алмаймын. Ары кетсе, тойларда немесе туыстар жиналып қалатын жерлеу сияқты рәсімдерде кездесіп қалатынбыз", - деді депутат.

Еске салайық, бұған дейін де полиция Хасан Қасымбаевтың ұсталуына қатысты пікір білдірді.

Полиция департаментінің мәліметінше, Қасымбаев 2 қарашада ұсталып, уақытша ұстау изоляторына қамауға алынған. Ол азамат А.ны ұрлап, денсаулығына ауыр зиян келтірді деген күдікке ілінген. Оқиға 2021 жылғы маусымда болған. 

Хуторлық Хасан Қасымбаев не үшін ұсталған?

Артынша Қасымбаевтың әйелі оның немен айналысатынын айтты.

Аптаның басты оқиғалары мен пайдалы видеоларды көру үшін YouTube арнамызға жазылыңыз