Семейді қандай өзгерістер күтіп тұр?

Брифингте Абай облысының әкімі Нұрлан Ұранхаев Семей қаласын абаттандыруға жоспарланған жұмыстарға тоқталды. Биыл Молдағалиев көшесінен Жамбыл көшесіне дейінгі көшенің бойында жаңа шағын ауданның құрылысы басталды. Оның аясында көпқабатты тұрғын үй, әлеуметтік, шағын және орта бизнес нысаны, мектептер, сондай-ақ, кең жағажай салынады.

Қазіргі таңда 1200 орындық мектеп құрылысы жүріп жатыр. Бұл "Новостройка" және "Океан" аудандарында оқушыларға орын тапшылығын азайтады. Ғимарат "KAZ Minerals" ЖШС-мен жасасқан меморандум аясында салынады. Мектеп 2024 жылы пайдалануға беріледі деп жоспарланған.

"Бас жоспарды жүзеге асыру аясында Конгресс-холл мен стадион салу да жоспарланған. Мұнда заманауи Жаңа-Семей болады. Қосымша көгал аймағы да қарастырылған. Ескі үйлердің барлығы бұзылады. Молдағалиева көшесінің бойында жағалау салынады", - деді аймақ басшысы.

Бүгінде сол жағалаудағы көпір асты кеңістігін ретке келтіру жұмыстары аяқталуға жақын. Мұнда қабырға суреті бар спорт алаңы, баскетбол және футбол алаңы, 250 шам орнатылған сәулеттік жарықтандыру, амфитеатр, фуд-корт және отбасылық мейрамхана бар. Сондай-ақ, бұзақылық фактілерін алдын алу үшін учаскелік полиция пункті орналасады. Кеңістіктің ашылуы 10-15 қазанға жоспарланған.

Айта кетсек, абаттандыру жұмыстары да жан-жақты қарастырылған. Мердігерлердің айтуынша, климатқа сай көпжылдық өсімдіктер егілген.

Жамақаев және Мәңгілік Ел көшелерінің бойындағы қоғамдық кеңістікте де жөндеу жұмыстары жалғасып отыр, яғни спорт және балалар ойын алаңы, шағын архитектуралық нысан орнатылып жатыр. Бүгінде жарықтандыру, спорт және балалар ойын алаңы мен Жамақаев көшесіне амфитеатр орнату, Мәңгілік Ел көшесіне жабын төсеу және шағын нысанды орнату жұмыстары жүргізілді. Жақын арада 26-ға жуық нысанды қамтитын жаяу жүргіншілер көшесін жөндеу, 5000 шаршы метрден астам жаяу жүргіншілер аймағын жасау және 200 орындық автотұрақ орналасатын кеңістік салынады.

Сондай-ақ, Ертіс жағалауынан Бейбітшілік аралына дейін жаңа жаяу жүргіншілер көпірінің құрылысы басталады. Бұл жоба аясында теміржол салынып, түрлі ұлттардың киіз үйі тігілген этноқалашық, сондай-ақ балалар ойын алаңы салынады.

"Бейбітшілік аралына дейін жаяу жүргіншілер көпірі салынады, ол жерде облыс қонақтары мен тұрғындарын этноқалашыққа, саябаққа және биологиялық орталыққа апаруға мүмкіндік беретін теміржол болады", - деді облыс әкімі.

Абай облысы әкімдігі ұсынған материал

Өзекті жаңалықтарды өз уақытында оқу үшін Facebook парақшамызға жазылыңыз!