Саакашвили өлім аузында жатыр - дәрігер

Түрмеде жатқан Грузияның экс-президенті Михаил Саакашвили "Вивамед" емханасында өлім аузында жатыр. Бұл туралы саясаткерге барған невропатолог Отар Тоидзе мәлімдеді, - деп хабарлайды "Грузия Онлайн" сайты.

Тоидзенің айтуынша, бұрынғы мемлекет басшысының денсаулық жағдайы туралы қорытынды баяндама жасау үшін жақын күндері бір топ дәрігер барады.

"Бір айға жуық уақыт бойы біз оған бармадық. Оның қазіргі жағдайын БАҚ беттерінен және дәрігерлермен қысқаша әңгімеден ғана білеміз. Менің Михаил Саакашвилиге барған бірінші және соңғы сапарым арасында айырмашылық бар. Ол ешқашан сөйлеуден, жүруден қиналмаған адам. Қазір жағдайы ауыр. Сондықтан объективті баға беріп, қорытынды жазу үшін барып қалатын шығармыз. Ол өлім аузында жатыр", - деді невропатолог.

Сәрсенбіде Саакашвилиге барған митрополит Николоз саясаткердің емханада 11 келіге азып кеткенін айтқан болатын.

"Мен келгенде бірінші азып кеткенін байқадым. Оның дәл осылай азғанын ешқашан көрмегенмін. Ол маған емханаға ауыстырылғаннан бері 11 келіге азғанын айтты", - деді Николоз.