Ресейден кеткен Ксения Собчак қайда екені белгілі болды
![Ресейден кеткен Ксения Собчак қайда екені белгілі болды](/userdata/news/news_73714/image_l.jpg)
Ресейлік журналист және тележүргізуші Ксения Собчак Литвада. Бұл ақпаратты Литва Мемлекеттік қауіпсіздік департаментінің басшысы Дарюс Яунишкис ресми түрде растады, - деп хабарлайды DELFI басылымы.
"Ол Литвада. Израиль азаматы ретінде оған виза қажет емес. Ол осында қалаған уақытында келіп, 90 күн қалуына болады. Иә, біз бұл деректі растаймыз", - деді Дарюс Яунишкис Zinių radijas радиосына берген сұхбатында.
Яунишкис Собчак Литва қауіпсіздігіне қауіп төндіретіні туралы ешқандай дәлел жоқ деп мәлімдеді.
"Әзірге Литваның қауіпсіздігіне қауіп төндіретіні туралы нақты дерек жоқ. Егер мұндай ақпарат болса, тиісті шаралар қабылданар еді", - деді ведомство басшысы.
Литва парламентінің ұлттық қауіпсіздік және қорғаныс жөніндегі комитетінің бұрынғы төрағасы Дайнюс Гайжаускас Собчактың келуі таңғалдырғанын мойындады.
"Собчактың Литваға келгенін, біздің елді таңдағанын білгенде қатты таңғалдым. Неліктен? Қандай мақсатта? Арнайы қызмет өкілдері бұл сұраққа жауап береді деп үміттенемін", - деді ол.
Еске салайық, тележүргізуші Ксения Собчактың коммерциялық директоры Кирилл Суханов бопсалау бойынша қамауға алынып, Собчак мұны "редакцияға жасалған қастандық" деп бағалап, Ресейден кетіп қалған болатын.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Г. Досымшалова