Ресейде қазақстандықты зорлады деп айыпталған экс-полицейлер сотталды
![Ресейде қазақстандықты зорлады деп айыпталған экс-полицейлер сотталды](/userdata/news/news_68785/image_l.jpg)
Екатеринбургтің Ленин аудандық соты қазақстандық әйелді қызметтік көлікте зорлады деп айыпталған бұрынғы үш полицейді бес жылдан алты жылға дейін бас бостандығынан айырды. Бұл туралы "Аксиома" құқық қорғау жобасының Telеgram-арнасында жазылған, - деп хабарлайды Tengrinews.kz тілшісі.
Айыпталушы Вадим Мустафин алты жылға, Вячеслав Тропин бес жарым жылға, Андрей Бессарабов бес жылға сотталған. Олар сот залында қамауға алынған.
2019 жылғы тамызда полиция қызметкерлері Вячеслав Тропин, Андрей Бессарабов және Вадим Мустафин Екатеринбургте саунадан шыққан 22 жастағы қазақстандық әйелді ұстаған. Олар қызметтік УАЗ көлігінде әйелді зорлап, кейін оны бөлімшеге апаратынын, онда бәрі "зорлайтынын" айтып қорқытқан.
Кейінірек Сыртқы істер министрлігі Ресейде полицейлер қазақстандық әйелді зорлағаны туралы ақпаратқа жауап берген.
Тәртіп сақшылары тұтқындалған, ал 2020 жылғы шілдеде олар қыз зорлағаны үшін кінәлі деп танылған. Айыпталғандар қызметінен босатылған, ал бастықтары отставкаға кеткен. Бірақ 2021 жылғы қарашада Екатеринбургтің Ленин аудандық соты полицейлердің әрекетінен қылмыс белгілерін таппай, оларды ақтаған.
Алайда 2022 жылғы ақпанда Свердлов облыстық соты экс-полицейлерді ақтау үкімінің күшін жойған. Бұл іс бірінші сатыдағы сот қарауына жіберілген.
Ж. Қадыржанова