Қазақстанның үш қаласына Ресей салатын жылу станцияларының тарифін кім белгілейді деген сұраққа Үкіметте өткен брифингте Энергетика вице-министрі жауап берді, - деп хабарлайды Massaget.kz тілшісі.
Бұған дейін әлеуметтік желілерде жылу тарифтерін де Ресей тарапы белгілейді деген ақпарат тараған болатын. Брифингте журналистер аталған сұрақты Үкімет мүшелеріне қойды. Энергетика вице-министрі Сұңғат Есімханов аталған ақпаратты жоққа шығарды.
"Бұл жалған ақпарат. Үш жылу орталығын салуға үкіметаралық келісім бар, жұмыстар жасалып жатыр. Тапсырыс беруші - "Самұрық Энергия" компаниясы. Ресей тарапы ол станцияларды мердігер ретінде тек салады. Салынып болғаннан соң ол станциялар "Самұрық Энергия" компаниясының құзыретінде болады. Орталықтар салынғаннан кейін ғана тариф бекітіліп, инвестицияларды қайтару басталады", - деді энергетика министрі.
Айта кетейік, қараша айында ҚР Премьер-министрінің орынбасары Серік Жұманғарин Ресей тарапы Көкшетау, Семей және Өскеменде жаңа жылу электр станцияларын салатынын мәлімдеген.
Аптаның басты оқиғалары мен пайдалы видеоларды көру үшін YouTube арнамызға жазылыңыз
А. Бақдаулет