Референдум: шетелдегі барлық учаске жұмысын тоқтатты

Шетелдегі барлық 74 учаскелік референдум комиссиясы өз жұмысын аяқтады, – деп хабарлайды Massaget.kz тілшісі Сыртқы істер министрлігіне сілтеме жасап.

59 елде дауыс берген Қазақстан азаматтарының жалпы саны – 9976 адам. Бұл – дауыс берушілердің 81,06 пайызы. 

Айта кетейік, жалпы республика бойынша референдумда 7 820 918 азамат дауыс берген. Облыстардың, республикалық маңызы бар қалалардың, елорданың комиссиялары ұсынған деректерге сәйкес 2024 жылғы 6 қазанда сағат 20.00-дегі жағдай бойынша тізімге енгізілген азаматтардың жалпы санының 63,87%-ы бюллетень алды.

Учаскелік референдум комиссиялары дауыстарды санауға кірісті. Учаскеде дауыстарды санау уақыты оларды санау басталғаннан кейінгі он екі сағаттан аспауға тиіс.

Алдын ала қорытынды бүгін, 7 қазанда жарияланатын болады. 

Еске салайық, 2 қыркүйекте Президент Қасым-Жомарт Тоқаев Қазақстанда атом электр станциясының құрылысын салу мәселесі бойынша референдум өткізу туралы Жарлыққа қол қойды. Қазақстан АЭС-ке қатысты референдумды өткізуге 15,5 миллиард теңге жұмсайтыны хабарланды.

Кейінірек Орталық сайлау комиссиясының төрағасы Нұрлан Әбдіров Қазақстанда АЭС салу бойынша өтетін референдумда бір ғана сұрақ қарастырылатынын айтты.

АЭС салу референдумы қалай өтеді?

Сондай-ақ Қазақстанда АЭС салуды қолдау жөніндегі халықтық штаб құрылды.

АЭС бойынша референдум: бюллетеньде не жазылады?

Өңірлердің АЭС құрылысы бойынша референдумға дайындығы қандай?

Энергетика министрлігі өкілі Massaget.kz-ке берген сұхбатында Қазақстан АЭС құрылысын жүргізетін елге тәуелді болмайтынын мәлімдеді.

Айта кетейік, Қазақстан заңнамасына сәйкес, референдум – маңызды мәселелер бойынша жалпыхалықтық дауыс беру. Оны "Республикалық референдум туралы" Конституциялық заң реттейді, ал ұйымдастырумен арнайы құрылған комиссия айналысады.

Референдум бойынша дауыс беру бүгін, 6 қазанда сайлау учаскелерінде сағат 07:00-ден 20:00-ге дейін өтті. Бұл ретте 80-нен аса учаске өз жұмысын 06:00-де бастады. Республика бойынша дауыс беруге арналған 10 000-нан аса учаске бар. Шетелде Сеул мен Токиода учаскелер бірінші ашылды.

Жергілікті атқарушы органдар республика бойынша дауыс берушілердің тізіміне 12 миллион 244 мың 683 азаматты енгізді.

Instagram парақшамызға жазылып, ең қызықты ақпараттарды бірінші болып оқыңыз!