Жұлдыз FM радиосы он жылдық мерейтойына орай, 13 сағаттық радиомарафон ұйымдастырып, бас жүлде - автокөлік ұтысын өткізді.
Радионың мерейтойына арналған ауқымды ұтыстар легі 12 тамызда басталып, оған Қазақстанның түкпір-түкпіріндегі тыңдармандар белсене атсалысты.
Мерейтойлық ұтыс 10 желтоқсанда тікелей эфирде қорытындыланды. Бұл күні Жұлдыз FM студиясы нағыз жұлдыздар ордасына айналып, радионы 10 жылдығымен Мақпал Жүнісова, Айқын Төлепберген, "Меломен" тобы, "Әдемі-Ай" дуэті, Дана Кентай, Назарбек Оразбеков, Ұшқын Жамалбек, т.б. танымал әншілер құттықтап келді. Таңғы 7-ден кешкі 8-ге дейін үздіксіз жалғасқан тікелей эфир кезінде тыңдарман назарына жанды дауыстағы әндер, қызықты сұхбаттар ұсынылып, естелік сыйлықтар табысталды.
Жұлдыз FM мерейтойының көпшілік күткен басты сәті - автокөлік ұтысы болды. Тікелей эфирде Қазақстанның Халық әртісі Мақпал Жүнісова темір тұлпарды иеленетін жеңімпаздың нөмірін анықтады. Әнші лототроннан 18-ші нөмірлі шарды алып шығып, қара түсті заманауи KAIYI E5 седаны ақтөбелік тыңдарман Әлібек Бекмашевқа бұйырды.
Бес баланың әкесі, көлік жөндеумен айналысатын Әлібек Бекмашев қуанышы қойнына сыймай, бағалы сыйлық ұсынған Жұлдыз FM радиосына алғысын жаудырды.
"Керемет сезімдемін! Эфирде өзімнің нөмірім айтылған кезде тіпті сенер-сенбесімді де білмедім. Қатысушы нөмірін 6 қыркүйекте алып, сол кезден бері бас жүлденің ұтысын тағатсыз күткен едім. Бұл жеңіс - бес баламның несібесі болар. Жұлдыз FM радиосы жасай берсін, мың алғыс!" - деп қуанышын бөлісті Әлібек.
Конкурстың шарттары мен механикасы жан-жақты ойластырылды. 12 тамыздан бастап, 10 желтоқсанға дейін тыңдармандар радионы үзбей тыңдап, эфирде әндер арасында айтылған құпия сөздерді жазып алып, арнайы WhatsApp-нөмірге жолдап отырды. Күн сайын 3 құпия сөзді оныншы болып жолдаған тыңдармандарға қатысушы нөмірлері беріліп, олар автоматты түрде автокөліктен басқа, Бейжің, Пхукет пен Ыстамбұлға бару-қайту билеттеріне үміткер атанды.
Мерейтойлық марафон 10 қыркүйекте Бейжіңге бару-қайту билеттерінің ұтысымен басталып, 10 қазан мен 10 қарашада Ыстамбұл мен Пхукетке баратын тыңдармандар анықталды. Ал 10 желтоқсанда 10 жылдықтың бас жүлдесі - автокөлік ұтысымен әдемі қорытындыланды.
Жұлдыз FM негізі 2014 жылы қараша айында қаланып, 10 жыл ішінде Қазақстандағы ең танымал радиолардың біріне айналды. Ерекше формат, тек ана тіліміздегі әндер мен жүргізушілердің шеберлігінің арқасында Жұлдыз FM радиосы еліміздің түкпір-түкпіріндегі миллиондаған тыңдарманның жүрегіне жол таба білді. Радиостанция заман көшінен қалмайды, бағдарламалары радио эфирінен бөлек, әлеуметтік желілерде де тікелей эфирге шығады.
10 жыл ішінде Жұлдыз FM радиосы ұлттық ауқымда мойындалып, "Халықтың сүйіктісі", "Үркер", "Толқын" секілді беделді сыйлықтар мен жүлделерді иеленді. Бүгінгі таңда эфирде 7 жүргізуші тыңдарман көңілін көтеріп, елдегі ең өзекті жаңалықтарды жеткізіп отырады, ал радионың жалпы командасы 20 шақты адамнан тұрады.
Жұлдыз FM радиосындағы ең танымал бағдарламалар:
• "Таңғы шоу" - таңғы ойын-сауық бағдарламасы, радиомен қатар, телеарнадан да көрсетіледі.
• "UIDE" - жұмыстан үйге қайтар жолды қысқартатын, қызықты әңгіме айтылып, эстраданың жас әншілері таныстырылатын кешкі бағдарлама.
• "Жаңалықтар" - таңғы 8-ден кешкі 7-ге дейін радионың жаңалықтар қызметі еліміздегі ең елеулі жаңалықтарды тыңдарманға жедел жеткізіп отырады.
• "Кешкі Life" - жаңа әндердің тұсауы кесіліп, тыңдармандар арасында сан түрлі сыйлықтар ойнатылатын кешкі бағдарлама.
• "Сәлем саған, туған ел" - сағынышты сәлемдер мен жылы тілектер жолданатын құттықтау-сазды бағдарламасы.
• ZHULDYZ DANCE - жұма және сенбі күндері кешке эфирге шығатын заманауи ди-джейсеттері.
Жұлдыз FM радиосы алдағы уақытта да тыңдарманын сапалы контент және өзгеше жобалармен қуанта бермек. Ал 10 жылдық мерейтой бүгінге дейін радионы үзбей тыңдаған адал тыңдармандар үшін де, құттықтап келген қонақтар үшін де, 13 сағаттық эфирді үзбей тізгіндеген жүргізушілер үшін де нағыз естен кетпес мереке болды.
Жұлдыз FM радиосын Алматыда 101.4 FM, Астанада 100.8 FM жиіліктерінен және еліміздің басқа да қалаларында тыңдай аласыздар.