Прокурор бұрынғы министр Біртанов ісіндегі шығынды атады
![Прокурор бұрынғы министр Біртанов ісіндегі шығынды атады](/userdata/news/news_73064/image_l.jpg)
Прокурор бұрынғы денсаулық сақтау министрі Елжан Біртанов пен бұрынғы денсаулық сақтау вице-министрі Олжас Әбішевтің мемлекетке келтірген шығыны туралы айтты, - деп хабарлайды Massaget.kz тілшісі.
Бүгін Елжан Біртанов пен Олжас Әбішевке қатысты іс бойынша тергеу аяқталды.
"Біртанов пен Әбішевке "Денсаулық сақтаудың ақпараттық жүйелерін ақпараттандыру және өзара әрекеттесуі" платформасындағы жұмыстарды мемлекеттік сатып алу конкурсын өткізбей-ақ аяқтау, пилоттық пайдалануды енгізу және жұмысы аяқталмаған платформаны қабылдау туралы келісім жасасып, өкілеттігін асыра пайдаланды деген айып тағылды. Мемлекетке 1 миллиард 548 миллион 136 мың теңге немесе 4 миллион 177 мың доллар көлемінде залал келтірілген", - деді мемлекеттік айыптаушы Бауыржан Шекенов.
Ол Біртанов пен Әбішевтің әрекеті салдарынан мемлекет 4 миллион 660 мың доллар көлемінде банк кепілдігін өндіріп алу құқығынан айырылғанын мәлімдеді.
"Сонымен қатар, Біртановқа 2020 жылдың маусымында іссапарда болған кезінде COVID-19 тестінен өтіп, теріс нәтиже алғанына қарамастан, Жамбыл облысының емдеу мекемелеріне медициналық көмекке жүгінбей, Ұлттық жедел медициналық жәрдем орталығының қызметкерлеріне Тараздан Астанаға санитарлық авиация бортында тасымалдауды ұйымдастыру туралы заңсыз нұсқау берген деген айып тағылды. Бұл мемлекетке 5,5 миллион теңге шығын келтірді", - деді Шекенов.
Біртанов та, Әбішев те өз кінәсін мойындамады.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Г. Досымшалова