Президенттік жастар кадр резервіне үшінші іріктеуге қатысуға құжаттарды қабылдау аяқталды. Өтінімдерді қабылдауға берілген бір айда жобаның pkrezerv.gov.kz ресми сайтында 30 мыңнан астам адам тіркелген, - деп хабарлайды Massaget.kz тілшісі мемлекеттік қызмет істері агенттігінің баспасөз қызметіне сілтеме жасап.
Оның ішінде 6 404 қатысушы "Мәтіндік ақпаратпен жұмыс істеу қабілетін бағалау" тестілеуіне жіберілді.
"Резервке іріктеу 6 кезеңнен тұрады: құжаттарды қабылдау, мәтіндік және сандық ақпаратпен жұмыс істеу қабілетін бағалау, ситуациялық тапсырмаларды шешу, құзыреттерді бағалау (ассессмент-орталық және құзыреттілік бойынша сұхбат), сарапшылық комиссиясында әңгімелесу және Ұлттық комиссияның отырысы. Президенттік жастар кадр резерві – мемлекеттік басқару жүйесіне креативті және бастамашыл жастарды тартуға бағытталған жоба", - делінген хабарламада.
Іріктеу қорытындысы бойынша резервке 50 адам қабылданады. Жеңімпаздар биыл желтоқсан айының соңында жарияланады.
Өзекті жаңалықтарды өз уақытында оқу үшін Facebook парақшамызға жазылыңыз!