Президент Іс басқарушысы Бурабайда өрттің алдын алу үшін қандай жұмыстар жоспарланғанын айтты

Президент Іс басқарушысы Айбек Дәдебаев жазғы маусым басталуына орай Бурабай табиғи паркі туралы жағдайды айтты, - деп хабарлайды Massaget.kz тілшісі.

"Былтыр курорттық аймаққа 711 мыңнан аса адам келді. Бұл - тек ұлттық парктің бақылау-өткізу бекетінен өткендердің саны. Ал биылғы көрсеткіш былтырғыдан кем түспейді деп межеленіп отыр. Әрине, туризмді дамытып жатқан өңірге демалушылардың көп келгені жақсы. Дегенмен ұлттық парк үшін бұл біршама жүк екенін де ескерген жөн. Сондықтан "Бурабай Даму" кәсіпорны мен "Бурабай" ұлттық паркі белсеніп жұмыс істеуі керек. Бұл, әсіресе, өрт қауіпсіздігі мен қорықты қорғауға қатысты", - деп жазған ол Telegram-да

Айбек Дәдебаев өрттің алдын алу мақсатында қандай жұмыстар жоспарланған мәлімдеді.

"Биыл жалғасын табатын Smart National Park Burabay жобасының аясында 5 өткізу-бақылау бекетін автоматтандыру, қоршаған ортаға мониторинг және сараптама жасайтын қосымша құралдар орнату, ғылыми жұмыстарды күшейту жоспарланып отыр. Сонымен қатар, өртті ерте анықтайтын қосымша 3 бақылау камерасы қойылмақ. Осылайша, бақылау камералары бар 17 мұнара "Бурабай" паркінің ғана территориясын емес, іргелес жатқан қорғалатын аумақты да бақылап отыратын болады. Бұл дегеніміз - 377 166 гектар жер", - делінген хабарламада.

Бұл жүйе былтыр да өт нәтижесін көрсеткен.

"Смарт жүйе өртті дер кезінде анықтап, тез арада ауыздықтауда өз тиімділігін көрсетті. Мысалы, былтыр 21 өрт оқиғасы тіркеліп, жалын шарпыған жер көлемі 1,3 гектармен шектелді. Яғни, тілсіз жаудың таралу аумағы 2021 жылмен салыстырғанда 8,6 есе азайды.

Айта кетерлік тағы бір жаңалық, биыл жазда туристердің ат шалдырып, аяқ суытуына арналған қосымша 35 бекет бой көтереді, оның ішінде 26 бекетке от жағатын ошақ қойылады. Стол, сәкі, ошақ, өрт сөндіру құралдары қойылған осындай орындар Үлкен Шабақты, Кіші Шабақты көлдерінің жағасында, сондай-ақ, "Терраса парк" қонақүйінен "Ақбура" курортына дейін созылып жатқан велосипед жолының бойында орналасады. От жағуға болмайтын, тек тамақтанатын, демалатын орындар "айқұлақ" мүсіннен бастап Абылай хан алаңына дейінгі веложолдың бойында, Кенесары үңгіріне жақын маңда салынады.

Туристерге арналған бекеттердің нақты картасын "Бурабай Даму" ЖШС мен "Бурабай" МҰТП сайттарынан, сондай-ақ, Ұлттық парктің мобильді қосымшасынан көруге болады. "От пен су - тілсіз жау" деген сөз тегін айтылмаған. Табиғат аясында демалған кезде сақтық шараларын ұмытпайық", - деді ол.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!