Мемлекет басшысы Қасым-Жомарт Тоқаев республикалық Тамыз конференциясының пленарлық отырысында сөз сөйледі, - деп хабарлайды Massaget.kz тілшісі.
Президент педагогтерді аттестациядан өткізу талаптарын оңтайландыру жөнінде тапсырма берді.
"Өздеріңізге мәлім, мұғалімдерге кәсіби қолдау көрсету үшін "Өрлеу" біліктілікті арттыру ұлттық орталығы құрылды. Бірақ бүгінде бұл ұйымның жұмысы мардымсыз деуге болады. Мәселен, маған ұстаздардан аттестация ережесін қайта қарау туралы көптеген өтініш түсті. Мұғалімдер артық жүктеме және қағазбастылық көп екенін айтып, шағымданып отыр. Осыған орай, педагогтерді аттестациядан өткізу талаптарын оңтайландыру, жетілдіру жөнінде нақты тапсырма бердім. Бұл жерде бағалаудан мүлде бас тарту немесе оны күрделендіру туралы сөз болып отырған жоқ", - деді Қасым-Жомарт Тоқаев.
Мемлекет басшысының пікірінше, білімді әділ бағалау – білім беру жүйесінің өзегі.
"Бізге мейлінше түсінікті әрі ашық жүйе керек. Бұл – өте маңызды мәселе, оны қарастырған кезде жоғары жауапкершілік пен мінсіз кәсібилік таныту қажет. Тиісті министрлік бұл мәселемен айналысып, көп ұзамай нақты ұсыныстар беруге тиіс. Біліктілікті көтеру бағдарламаларына жаңа Конституция құндылықтарын, сондай-ақ, "Заң мен тәртіп", "Адал азамат", "Таза Қазақстан" идеяларын енгізген жөн, бұл қызметтік міндет деп айтуға болады", - деді Президент.
Instagram парақшамызға жазылып, ең қызықты ақпараттарды бірінші болып оқыңыз!
Ж. Қадыржанова