Президент қаржы пирамидасы туралы заңдарға қол қойды
![Президент қаржы пирамидасы туралы заңдарға қол қойды](/userdata/news/news_69315/image_l.jpg)
Президент Қасым-Жомарт Тоқаев қаржы пирамидасына қатысты заңдарға қол қойды, - деп хабарлайды Massaget.kz Ақорданың баспасөз қызметіне сілтеме жасап.
"Мемлекет басшысы "Қазақстан Республикасының кейбір заңнамалық актілеріне қаржылық (инвестициялық) пирамидалардың қызметіне қарсы іс-қимыл мәселелері бойынша өзгерістер мен толықтырулар енгізу туралы" Қазақстан Республикасының заңына қол қойды", - делінген хабарламада.
Сондай-ақ, Мемлекет басшысы қаржы пирамидалардың қызметіне қарсы іс-қимыл мәселелері бойынша толықтыру енгізу туралы заңға қол қойды.
"Мемлекет басшысы "Қазақстан Республикасының әкімшілік құқықбұзушылық туралы кодексіне қаржылық (инвестициялық) пирамидалардың қызметіне қарсы іс-қимыл мәселелері бойынша толықтыру енгізу туралы" Қазақстан Республикасының заңына қол қойды", - делінген хабарламада.
Еске салайық, түзетулердің мақсаты - қаржы (инвестиция) пирамидасын құру және оған басшылық еткені үшін жауапкершілікті күшейту. Сондай-ақ, азаматтарды қаржы пирамидасына тартуға әкеп соққан ақпаратты (жарнаманы) таратқаны үшін қылмыстық жауапкершілікті заңнамалық тұрғыда реттеу. Заң жобасы бойынша қылмыстық, қылмыстық іс жүргізу кодекстеріне өзгерістер мен толықтырулар енгізіледі.
Түзетулер бойынша:
- қаржы (инвестиция) пирамидаларын құрғаны және оларға басшылық еткені үшін жазаны қатаңдату;
- қаржы (инвестиция) пирамидасы ақпаратын жеке әрі тікелей таратқаны үшін, оның ішінде электрон ақпарат ресурстары арқылы елеулі залал келтіре отырып, адамдарды тартқандарға қылмыстық жауаптылық енгізу;
- қаржы (инвестиция) пирамидаларын жарнамалағаны үшін тергеу тағайындау.
Қаржы пирамидаларын жарнамалау қылмыстық жауапкершілікке әкеп соғады. 1-бөлім бойынша 2000 АЕК дейін айыппұл cалынуы немесе қоғамдық жұмыстарға тартылуы мүмкін. Ал 4-бөлім бойынша 7 жылға дейін бас бостандығынан айыру жазасы көзделеді.
Ж. Қадыржанова