Президент Қарағанды облысының әкімі Ермағанбет Бөлекпаевты қабылдады

Мемлекет басшысы Қарағанды облысының әкімі Ермағанбет Бөлекпаевты қабылдады, - деп хабарлайды Massaget.kz тілшісі.

Президентке Қарағанды облысының 2023 жылғы әлеуметтік-экономикалық даму қорытындысы туралы есеп берілді.

Ермағанбет Бөлекпаевтың баяндамасынан:

• былтыр 11 айдың ішінде өңірдегі өнеркәсіп өнімінің көлемі 3,1 трлн. теңгені құраған;
• негізгі капиталға салынған инвестиция 16,3 пайызға артып, 727 млрд. теңгеге жеткен;
• өңдеу өнеркәсібі салаларында: машина жасау ісінде 45 пайыз, жеңіл өнеркәсіпте 23,9 пайыз, фармацевтикада 20 пайыз өсімге қол жеткізілген;
• қағаз өнеркәсібінде, құрылыс индустриясы мен қара металлургияда өсім байқалады;
• шағын және орта бизнес саласында 100 мыңнан астам компания қызмет етеді және бұл бағытта өңірдегі белсенді халықтың 45 пайызы жұмыс істейді;
• кәсіпкерлер үшін бөлшек салықтың мөлшері 4 пайыз-дан 2 пайызға дейін төмендеген. Биыл жалпы өңірлік өнімдегі шағын және орта бизнестің үлесін 19 пайыз-дан 25 пайызға арттыру жоспарланған;
• экономиканың барлық саласында 25 мыңнан астам жұмыс орны ашылып, жұмыссыздық деңгейі 4,1 пайызға, кедейлік деңгейі 2,7 пайызға дейін төмендеген;
• халықтың нақты табысы 4,7 пайызға көбейген;
• ауылдарда 92 денсаулық сақтау нысанының құрылысы, екі ауданаралық аурухананы жаңғырту жұмыстары басталған;
• биыл "Жайлы мектеп" жобасы аясында өңірде 7100 орындық 10 мектеп пайдалануға берілмек.

Бұдан бөлек, Президентке жылыту маусымының барысы, Qarmet кәсіпорнындағы қазіргі жағдай туралы баяндалды. Мемлекет басшысына жаңа инвестордың өндірісті тұрақтандыру және оның көлемін арттыру бағытында қабылдап жатқан шаралары, сондай-ақ өндірісті жаңғырту және компания жұмысшыларының еңбек қауіпсіздігін қамтамасыз ету жоспары жөнінде мәлімет берілді.

Сонымен бірге Ермағанбет Бөлекпаев әлеуметтік саланың жай-күйі, "Ауыл – ел бесігі" және "Ауыл аманаты" жобаларының іске асырылуы туралы да баяндады.

Қасым-Жомарт Тоқаев облысты одан әрі дамыту және тұрғындардың әл-ауқатын жақсарту жөнінде бірқатар тапсырма берді. Сондай-ақ Qarmet компаниясына қарасты нысандардағы жағдайды ерекше бақылауға алу қажет екенін атап өтті.

Instagram парақшамызға жазылып, ең қызықты ақпараттарды бірінші болып оқыңыз!