Прага орталығындағы университетте атыс болды: 11 адам қаза тауып, ондаған адам жараланды
![Прага орталығындағы университетте атыс болды: 11 адам қаза тауып, ондаған адам жараланды](/userdata/news/news_97422/image_l.jpg)
Бейсенбі күні, 21 желтоқсанда Праганың орталығындағы Карл университетінің философия факультетінің ғимаратында атыс болып, салдарынан 11 адам, соның ішінде мұны ұйымдастырған адам да қаза тауып, ондаған адам жараланды, - деп хабарлайды Massaget.kz тілшісі.
Прага мэрі Богуслав Свобода атысты ұйымдастырған адам шатырдан құлап мерт болғанын айтты. Расталмаған мәліметтерге қарағанда, ол өзіне оқ атқан.
"Сағат 15:15-те факультеттің электронды поштасына хатшылықтан кеңселерде тосқауыл қою, жарықты өшіру және есіктерді жиһазбен қоршау туралы бұйрық келді", - деді куәгерлердің бірі.
Студенттер Желіде білім алушылар мен мұғалімдердің аудиториялар мен кітапханада қамалып қалғаны туралы ақпаратты бөлісті. Кейбірі қашып, шатырға шығып кеткен.
Nova телеарнасының tn.cz сайты ғимараттың төбесінде қарумен тұрған адамның суретін жариялады. Басылым сол жерде жарылыс дыбысы естілгенін жазды. Телеарна оқиға орнынан видео таратты.
Полиция өкілі Михаэла Рихтерова күдіктінің кім екені анықталып жатқанын хабарлады. Ол полицейлер 1968 жылы туған ер адамның зорлық-зомбылықпен қаза табуына байланысты 1999 жылы туған ер адамға іздеу салынғанын айтты. Баспасөз хатшысы істің басқа мән-жайына қатысты әзірше түсінік берген жоқ.
Оқиға орнында полиция көліктері, құтқару топтары, жедел жәрдем және өрт сөндірушілер жүр. Құтқарушылар зардап шеккендердің жеңіл және ауыр жарақат алғанын айтып отыр.
Полиция Ян Палах алаңының айналасындағы аумақты түгел жауып тастады. Қозғалыс тоқтатылды, трамвайлар мен автобустар басқа бағыттарға бағытталды. Алаңға іргелес Манес көпірі жабық. Алаңда бірнеше жоғары оқу орны мен концерт залы орналасқан.
Влтаваның қарсы жағалауындағы трамвай қозғалысы да тоқтатылды. Жараланғандарды Орталық әскери госпитальге қабылдап жатыр.
Instagram парақшамызға жазылып, ең қызықты ақпараттарды бірінші болып оқыңыз!
М. Лұқпан