Польша азаматшасы Қазақстан президенттігіне үміткер болғысы келеді
![Польша азаматшасы Қазақстан президенттігіне үміткер болғысы келеді](/userdata/news/news_72721/image_l.jpg)
Польша азаматшасы Қазақстан президенттігіне үміткер болғысы келеді, - деп хабарлайды Massaget.kz тілшісі ОСК баспасөз қызметіне сілтеме жасап.
"Польша азаматшасы Балли Мажец Қазақстан Республикасының Орталық сайлау комиссиясына Қазақстан Республикасы президенттігіне үміткер ретінде қатысу ниеті туралы өтінішпен бірнеше рет жүгінген. Польша азаматшасына Конституцияның және "Қазақстан Республикасындағы сайлау туралы" Конституциялық заңның президенттікке үміткерлерге қойылатын талаптарға қатысты қолданыстағы заңнама талаптары түсіндірілді", - делінген хабарламада.
Орталық сайлау комиссиясының мәліметінше, Республика Конституциясының 41-бабының 2-тармағына сәйкес кем дегенде 40 жастағы, мемлекеттік тілді еркін меңгерген, кейінгі 15 жыл Қазақстанда тұратын және жоғары білімі бар азамат қана Қазақстан Республикасының президенті болып сайлана алады. Конституциялық заңда Республика президенттігіне үміткерлерге қосымша талаптар белгіленуі мүмкін.
Сонымен қатар, Орталық сайлау комиссиясы "Қазақстан Республикасындағы сайлау туралы" Конституциялық заңның 54-бабының 1-тармағына сәйкес, президент болып сайлану үшін азаматтың мемлекеттік қызметте не сайланбалы мемлекеттік лауазымдарда кемінде бес жыл жұмыс өтілі, сондай-ақ белсенді дауыс беру құқығы бар болуы керек.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Г. Досымшалова