Полиция жедел жәрдем көлігін қуған: оқиғаның мән-жайы

Алматы облысында ер адам бір түнде үш көлік ұрлап кеткен. Алматы полициясы оқиғаның жай-жапсарын айтты, - деп хабарлайды Massaget.kz.

Бұған дейін әлеуметтік желіде полицейлер жедел жәрдем көлігін қуып жүргені көрінген видео жарияланды.

Назар аударыңыз! Видеода балағат сөздер айтылған.

Алматы полициясы мәліметінше, 31 шілдеде сағат 21.45-те Құлжа тасжолы бойындағы тұрғын үй кешені аумағынан BMW көлігі ұрланғаны туралы хабарлама түскен. Ұры басқа көлікпен соқтығысып, оқиға орнынан қашып кеткен. Көп ұзамай Есік қаласына жеткенде, қарсы жолаққа шығып, Toyota көлігімен соқтығысқан. Ол жол апаты болған жерден қашып кеткен.

Көп ұзамай күдікті қыздың Nissan көлігін ұрлап кеткен, бірақ тасжолда аударылып қалған. Куәгерлер жедел жәрдем шақырған кезде, шабуылдаушыға оның да көлігін ұрлау идеясы келген.

"Облыстық жедел жәрдем бекетіне тиесілі Jac Sunray-мен қалаға қайта келгенде, оны патрульдік полиция экипажы "Ұстау" жоспары бойынша ұстады. Күдікті - 1994 жылы туған ер адам, медициналық куәландыру барысында есірткі тұтынғаны анықталған. Ол қамауда", - деді полицейлер.

Бөтен көлікті заңсыз иемдену дерегі бойынша Медеу аудандық ПІБ жанындағы полиция бөлімінде, сондай-ақ, Еңбекшіқазақ АІІБ-да үш қылмыстық іс тіркелген.